CTB-ek informatzen du

28/02/2017

BGPk martxoaren 8an merkaturako ditu aldi baterako txartel multimodal berriak

Bizkaiko Garraio Partzuergoak martxoaren 8an merkaturatuko ditu aldi baterako txartel multimodal berriak. BGPk informazio-kanpaina bat abiarazi du gaur titulu berriak ezagutzera emateko, hain zuzen, erabiltzaileak ohitu daitezen 3. linea martxan jartzeak ekarriko dituen titulu eta tarifa berrietara. Tituluok sinpleagoak izango dira, eta balioko dute Metro Bilbao, Euskotren eta Bilboko tranbian bidaiatzeko, eta Bizkaian erroldatuta dauden 26 urtetik beherakoen kasuan, Bizkaibusen ere erabili ahal izango dira.

Bada, hauexek dira aldi baterako titulu multimodal berriak: BIDAI 50, BIDAI 70 eta GAZTE 70, bidaia mugatuen kasuan; eta BIDAI ORO eta GAZTE ORO, bidaia mugagabeen kasuan. Hortaz, desagertuko dira aldi baterako txartel pertsonal edo jabe-txartel guztiak, bai eta BGPko garraiobide bakarreko Gazte txartelak ere, atxiki diren garraiobideetatik (EuskoTren eta Bizkaibusetik; Metro Bilbaoko urteko Gazte txartela, ordea, mantenduko da).

Gizartearentzat oro har direnek −BIDAI 50, BIDAI 70 eta BIDAI ORO− balioko dute Metro Bilbao, EuskoTren, Bilboko tranbia eta Larreinetako funikularrean bidaiatzeko. Gazteentzat direnak −GAZTE 70 eta GAZTE ORO−, berriz, aurreko garraiobideetan ez ezik, Bizkaibuseko linea guztietan ere erabili ahalko dira.

Beste ildo batean, BGPko Kontseilu Nagusiak bilera egin du gaur eguerdian Bilboko egoitzan, eta onetsi du Urdulizko Udalarekiko lankidetza-hitzarmena. Horren bidez, udalak 400.000 euro jasoko ditu, udalerria zeharkatzen duen zatian metroa lurperatu izanaren ondorioz sortutako azalera urbanizatzeko; hots, Bilbo Metropoliko Trenbidea elizatean lurperatzeko obren eragina izan duten urbanizazioa, zoladura, espaloiak, hiri-altzariak eta zerbitzuak birjartzeko.

Bestalde, BGPko Kontseilu nagusiak onetsi du Burgosko Udalaren proposamena, Burgosko garraiobide publikoan kontakturik gabeko txartela ezartzeko lankidetzari buruzkoa. Proposamena bi aldeen arteko lankidetza-hitzarmen baten bidez gauzatu da. Horren arabera, BGP Burgosko Udaleko Mugikortasun eta Garraio Zerbitzuarekin elkarlanean arituko da, bertan Barik eredua ezartze aldera: eskema, ezaugarriak, garapenak, teknologia, zehaztapenak etab.

Informazio gehiago: https://www.ctb.eus/eu/aldi-baterako-tituluak-barik-txartelean

EranskinaTamaina
PDF icon 170228_tit_cg.pdf56.68 KB
PDF icon folleto.pdf372.81 KB
21/02/2017

BGP-ak Plentziako Metro-geltokia birmoldatzeko obrak hasiko ditu.

Bizkaiko Garraio Partzuergoak (BPG) dagoeneko hasi ditu Plentziako metro-geltokia birmoldatzeko obrak. Horien bidez, eraikinaren birmoldaketa integrala guzatu eta egungo alboko sarbidea ordeztuko da. Proiektuaren egikaritze-epea hiru hilabetekoa da eta 213.300 euroko aurrekontua ezarri da.

314 metro karratuko oinplano-azalera duen eraikin bat eraikiko da, laukizuzen formakoa. Hiru gorputz desberdinez osatuta egongo da: zentrala —beheko solairua, lehen solairua eta teilatupea izango dituena— eta bi mutur —beheko solairua eta tailatupea soilik izango dituztenak—. Obra horien bidez, higiezinaren egitura saneatu, narriatuta dauden elementuak berritu, kanpoaldea margotu eta higiezina teilaberritu egingo da.

Bestalde, nasatik sartu eta irteteko zona berria geltokiaren albo batean kokatuko da, eta zaharra ordezkatuko du, hain zuzen ere Barrika eta Plentzia lotzen dituen errepidearen ondoan zegoena. Obrak egingo direla aprobetxatuz, itxarote-zona eguraldi txarraren ondorioetatik babestuko da; izan ere, estalita egon arren, euria eta haize-boladak zona horretara iristen ziren.

Geltokitik sartu eta irteteko zona berria hegoaldean kokatuko da, antzina Gurutze Gorriaren eraikina eta geltokiko taberna zeuden tokian (dagoeneko eraitsi direnak). Hala, erantzuna eman zaio udalak aspaldi egindako eskaera bati eta zona horretako segurtasuna handitu da, izan ere, zona hori geltokiaren ondoan dagoen foru-errepideko zirkulazioaren bizikide da.

15/02/2017

Hemendik aurrera Barik txartelarekin bidaiatu ahal izango duzu Donostiako Autobusetan

Bizkaiko Garraio Partzuergoak (BGP) jakinarazi du hemendik aurrera Barik txartela erabili ahal izango dela Donostiako hiri-autobusetan, DBus udal-konpainiakoak diren horietan, alegia. Hain zuzen ere, 45. linea (Renfe Bus geltokiak-Antigua-Aiete) aukeratu da ezarpen berri horrekin hasteko. Ondoren, gainerako lineetan pixkanaka-pixkanaka ezartzen joango dira, eta hemendik udaberrira DBus konpainiako linea guztietan erabili ahal izango da. BGPk, halaber, gogorarazi nahi du Gasteizko tranbian ere Barik txartelarekin ordaindu daitekeela 2014ko abendaren 22tik.

Linea hori ez da kasualitatez aukeratu; izan ere, 45. lineak Renfe nahiz Donostiako autobusen geltokiak zentroarekin, Antigua auzoarekin, unibertsitateekin eta Aieterekin lotzen ditu. Gainera, Barik txartela duten erabiltzaile bizkaitarrek gehien erabili ohi dituzten lineetako bat da.

Neurri hori erakunde eta operadore askoren arteko lankidetzari esker hartu da; besteak beste, Eusko Jaurlaritza, Euskadiko Garraio Agintaritza, etorkizuneko Arabako Garraioaren Lurralde Agintaritza, Bizkaiko Garraio Partzuergoa, Gipuzkoako Garraioen Lurralde Agintaritza eta Dbus aritu dira lanean.

21/12/2016

BGP-k Umeen Gabonetako Parkean parte hartuko du.

Bizkaiko Garraio Partzuergoak, Metro Bilbaorekin lankidetzan, aurten ere Umeen Gabonetako Parkean parte hartuko du. Bertan, stand bat jarriko du haurrek eta gazteek ondo pasa dezaten. Gainera, garraio publikoa zein Barik txartela erabiltzea sustatuko da bertan. Lau espazio ezberdin bereiziko dira adin ezberdinetako haur eta gazteentzako eskaintzekin: hainbat pista dituen scalextric handi bat, motorrik gabeko motoen zirkuitu bat txikienentzat, ludotekarako gune bat eta photocall bat.

19/12/2016

BGP-ko Kontseilu Nagusiak Metro Bilbao, Euskotren eta tranbian 3. linea abian jarritakoan ezarriko diren titulu eta tarifa berriak onetsi ditu; Aldundiak parte hartu du ezarpen horretan, Bizkaibuseko Gazte-trartel berriekin.

• Modu anitzeko txartel berriak sinplifikatuko dira, eta txartel berak erabiliko dira Bizkaiko garraiobide handienetako hirutan (Metro Bilbao, EuskoTren eta Bilboko tranbian).

• Titulu eta tarifak aldatu egin dira datorren apirilean 3. linea funtzionatzen hasiko delako. Bizkaia egituratuko duen linea berria izango da, eta behin betiko kenduko ditu hiru lineen arteko ontzi-aldaketa; horrenbestez, Alde Zaharreko lehenengo geltoki intermodala izango da, eta parametro berekin funtzionatuko dute linea horiek.

• Titulu eta tarifa berriek aldi baterako txartelak erabiltzen dituzten bidaiariengan izango dute eragina; bidaiari horiek guztizko kopuruaren % 22 dira (gainerako % 78ek diru-txartelak erabiltzen dituzte); hots, 45.000 pertsona hilean. Aurreikusi da zenbatekoa % 20 haziko dela urtebeteko epean.

• Bizkaiko Foru Aldundiak ezarpen horretan hartu du parte modu anitzeko Gazte-txartel berriak sartuz; gazteek Bizkaibusen ere erabili ahal izango dituzte txartel horiek, Metro Bilbao, Euskotren eta tranbiaz gain.

• Tarifa berriek lehenengo urratsa emango dute tarifa-integraziorantz. Oso aproposa da, 3. linea abian jarriko den heinean, baita beharrezkoa ere; izan ere, Metro Bilbao, EuskoTren eta Bilboko tranbiak Bizkaiko Lurralde Historikoaren garraio publikoaren % 58,1 mugitzen dute; Bizkaibusekin batera, % 74.

• Modu anitzeko txartel berriak 3. linea abian jarri baino hilabete lehenago egongo dira salgai. BGPk informazioa indartuko du jendeari arreta emateko bulegoetan, erabiltzaileak zonakatzea mantenduko duen sistema berrira ohitu daitezen.

EranskinaTamaina
PDF icon kn161219_eu.pdf57.44 KB
18/11/2016

BGP-k abian jarri du aldi baterako txartelak aldez aurretik erosteko zerbitzua.

Bizkaiko Garraio Partzuergoak (BGP) abian jarri du Barik txartelean txertatuta dauden aldi baterako txartelak aldez aurretik erosteko zerbitzua. Azaroaren 23tik aurrera, asteazkena, Gazte Metro, Gazte Bizkaibus, Gazte Bilbobus eta Metro Bilbao hilekoa direlako txartelak erabiltzen dituzten pertsonak hasiera-data baino lau egun lehenago erosi ahal izango dituzte txartelak. Gainera, hasiera-data erosterakoan aukeratuko dute. Garraio-modu askotan garapen ugari egin beharra ekarri duen baliabide berri horri esker, BGPk bonu horiek erabiltzen dituztenen premiei erreparatu die; izan ere, hemendik aurrera Barik txartelean diru-txartel bat, aldi baterako txartel aktiboa eta aldi baterako erreserbako txartela eduki ahal izango dituzte.

Mekanika ez da aldatuko. Aldez aurreko erosketa gaur egun Barik txartelak dituen aldi baterako txartelak kargatzeko puntuetan egin ahal izango da, hau da, metroan dauden saltzeko makinetan, Bilbobus eta Bizkaibuseko kabinetan, BGPren webgunean, kanpoko salmentaren bidez (kioskoak, merkataritza-establezimenduak, estankoak eta abar) eta sakelako telefonoarekin Barik NFC izeneko aplikazioaren bitartez. Azken kasuan, aldez aurretik erosi ahal izateko BARIK NFC aplikazioaren azken bertsioa eguneratu beharra dago, azaroaren 23tik aurrera ere deskargatu ahal izango dena, 00:00etatik aurrera. Une horretatik aurrera, ezin izango dira bertsio zaharrak erabili.

Erabiltzaileek erosketa aldez aurretik egin ahal izango dute erosterako unean indarrean eta aktibo dagoen aldi baterako txartela eduki zein ez eduki. Hilabeteko txartel horietako bat, lau dira guztira, indarrean badute, aldez aurretik erositako txartela erreserbako txarteltzat hartuko da hasiera-data heldu arte. Data hori erabiltzaileak aukeratu ahal izango du.

Era berean, aldi baterako txartela indarrean eta aktibo duen erabiltzaileak aukera izango du aldi baterako bonu bat erosteko baldin eta indarraldiak gainjartzen ez badira eta ezarritako epeen barruan badago. Aldez aurretik erosten den txartela eta aktibo dagoena ez dute zertan berdinak izan, modu eta eremu kopuru desberdinekoak izan daitezke, besteak beste.

EranskinaTamaina
PDF icon aurr_161118.pdf48.73 KB
17/11/2016

Eskerralde, Meatzalde eta Enkarterrietako 320 ikaslek parte hartuko dute aurten Aktibatu+ iraunkortasun programan.

Ekimen honen helburua pertsonen ohiturak aldatzea da, ur, energia, mugikortasun, erosketa eta hondakinen kudeaketari dagokionean, etxe zein ikastetxeetan iraunkortasuna sustatze aldera. Proiektuaren lehenengo lau faseetan 91 udalerritako 61 ikastetxek eta 1.964 familiak hartu dute parte. Aurreko edizioetan parte hartu duten ikastetxeek energia kontsumoan %17 aurreztea lortu dute, batez beste, eta CO2 isurpenak 1,8 tonatan murriztu zituzten; etxeek energiaren kontsumoan %5,2 eta uraren kontsumoan %3,5 aurreztea lortu zuten. Bestalde, %2,1ean murriztu zuten hondakinen sorkuntza eta %1,6an CO2 isurpenak.

aktibatu

EranskinaTamaina
PDF icon aktibatu_161117.pdf100.42 KB
04/11/2016

BGPak lizitatzera atera du Metro Bilbaoko Kabiezeseko behin betiko azpiestazioa eraikitzeko proiektuaren idazketa.

Bizkaiko Garraio Partzuergoak (BGPak) lizitatzera atera du Kabiezeseko behin betiko azpiestazioa, 145.000 eurotan eta 8 hileko egikaritze-epean, eraikitzeko proiektua. Proiektua idazteko zerbitzuaren lehiaketak irismena dauka; izan ere, proiektuak Iberdrola transformazio-zentrotik hargune elektrikoa, 2. lineara elikadura-hargunea, azpieztazio elektrikoa eta azpieztazioaren eraikina eraikitzea hartzen du barne. Hori abian jartzen denean, amaitutzat joko da Bizkaiko Santurtzi udalerriko puntu horretan egun dagoen behin-behineko azpieztazio operatiboaren jarduera, Kabiezesetik zirkulatu ahal izateko behin-behinean eraiki zena, hain zuzen.

Tren-unitateak katenariaren bitartez elikatzen dira; hau da, linea bakoitzan zehar estrategikoki jarrita dauden azpieztazioetan sortzen den energiaren bidez. Gaur egun, Metro Bilbaoren 2. lineak bi azpieztazio elektriko ditu Ansio eta Urbinagan, eta behin-behineko azpieztazio bat Kabiezesen (2. lineako tunelaren biseran behin betikoa funtzionatzen hasten denean itzaliko dena); instalazio horiek Metro Bilbaoko sare osoan zehar energia elektrikoa igorri eta banatzeko egokiak diren tentsio-mailak ezartzeko helburua dute.

EranskinaTamaina
PDF icon subkab_161104_eus.pdf46.39 KB
03/11/2016

BGP-k Barik-en 60.000 kargatze baino gehiago egin ditu sakelako telefonoaren bidez.

BGP-ren “Barik NFC” aplikazioaren bidez 60.000 kargatze baino gehiago egin dira, 400 bat egunean batez beste. 30.100 erabiltzailek doako “app” hori dagoeneko eskuratu dute, Android sistema eragilea duten sakelako telefono batetik Barik txartela kargatzeko aukera ematen duena.

Martxoaren 1etik, beraz, Barik txartela sakelako telefono adimenduen bitartez karga daiteke. BGP-k Google PlayStore-n aktibatu zuen “app” hori. Hari esker, denbora laburrean kargatzeko milaka puntu berri erantsi ahal izan dira, eta Bizkaian banatutako 800 fisikoei gehitu zaizkie (tabako dendak, kioskoak, kutxazainak, geltokiak...). Aplikazio berriari esker, erabiltzaileak edozein Barik kargatu ahal izango du, nahi beste aldiz, edozein tokitatik eta eguneko edozein ordutan. Horrez gain, geratzen den saldoari, azken mugimenduei eta beste gauza askori buruzko informazioa lortu ahal izango du.

Txartelen sistemen eremuan izaten diren azken aurrerapen teknologikoak, pixkanaka, Bizkaian ezarri nahi ditu BGPk; hain zuzen, proiektua BGPren politika horren barruan sartzen da. Lortutako datuei erreparatuz gero, arrakasta handia izan duela esan daiteke; izan ere, hasierako itxaropenak gainditu egin dira. Aplikazioa abian jarri aurretik, Barik txartelaren ohiko puntuetan kargatu ahal zitekeen txartela (Metro Bilbao, Euskotren, Euskotran, Renfe –FEVE barne-, Larreinetako funikularra, Artxandako funikularra, Bilbobus eta Bizkaibuseko kabinak, tabako dendak, kioskoak, merkataritza lokalak eta BBK-ko kutxazainak); eta abendutik aurrera webgunean bertan (ctb.eus) ere egin daiteke. Gaur egun, 1,5 milioi Barik txartela daude.

EranskinaTamaina
PDF icon nfc_161103_eus.pdf48.04 KB
28/10/2016

BGP-k energia aurrezkailuak jarriko ditu Metro Bilbaoko eskailera mekanikoetan.

Bizkaiko Garraio Partzuergoak (CTB) lehiaketara aterako du Metro Bilbaoko geltokietako eskailera mekanikoetan energia aurrezteko ekipoak hornitzeko eta jartzeko aldaketa. Zehazki, metroko 17 eskailera mekanikotan jarriko dira estreinakoz energia aurrezkailuak 30 motor berriren bidez; hala, egungo kontsumoa % 60raino murriztu ahalko da, 10.000 bat euro urtean eskailera bakoitzeko, eta inbertsioaren itzulkin tasa urtebeteko baino gutxiagokoa izango da. Indautxukoa hautatu da esperientzia pilotu hau aurrera eramateko, emaitza onuragarriak izan ditu, eta BGPk beste geltoki batzuetan apurka-apurka ezartzeko asmoa du.

Azken urteotan, Bizkaiko Garraio Partzuergoak, Metro Bilbaorekin batera, linean jarritako sistemetan zenbait jarduera egin ditu energia kontsumoa murrizteko asmoz. Geltoki batean gehien kontsumitzen duen sistema eskailera mekanikoarenak dira, lurpeko geltoki bateko kontsumo orokorraren % 50 baino gehiago. Horregatik, BGPk 172.000 euroko aurrekontua erabiliko du lehenengo energia aurrezkailu hauek sei hilabeteko epean hornitzeko eta jartzeko.

Metro Bilbaoko zenbait eskailera mekanikok, 2. linean batez ere, maiztasun erregulagailuak dituzte bidaiaririk ez badago energia aurreztu ahal izan dadin. Gainerakoak une honetan martxan/geldirik moduan programatuta daude, eskailerak bidaiariak antzematen dituen ala ez, horren arabera.

Bizkaiko Garraio Partzuergoa eta Metro Bilbao ahalegin handia egiten ari dira azken urteetan kontsumo elektrikoa murriztu dadin. Hala, ildo horretatik jarduera asko egin dira, Energiaren Euskal Erakundearen (EEE) diru laguntzak ere jaso dituzten jarduerak.

EranskinaTamaina
PDF icon aurrezkailuak_161028eus.pdf52.35 KB
25/10/2016

BGP-ren San Mameseko Arretarako Bulegoan egindako kontsultak bikoiztu egin dira irailean.

Bizkaiko Garraio Partzuergoak (BGP) San Mamesen duen Bezeroen Arretarako Bulegoan (BAB) egindako kontsultak bikoiztu egin dira irailean. Erregistratu diren 3.500 esku-hartzeetatik % 85 Barik txartelen kudeaketen inguruan izan da, batik bat, informazioa eskatzeko eta erreklamazioak jartzeko. Irailean, astelehenetan izan da kudeaketa-lan gehieneko eguna, 195 batez beste. Ekainean, aldiz, egunero 94 esku-hartze egin ziren batez beste; uztailean, 87; eta abuztuan, 85.

Bizkaiko Garraio Partzuergoaren Bezeroen Arretarako Bulegoaren helburua herritarren eta Bizkaiko garraio publikoaren arteko harremana hobetzea da, izapideak azkartuz, arretaren kalitatea hobetuz, berori bultzatuz eta eskaerak, iradokizunak zein izapideak burutuz. Laburbilduz, xedea garraio publikoko bezeroen informazio-eskaerei erantzuna ematea eta Barik txartelaren kudeaketa-lanak zentralizatzea da. Ildo horretatik, BGPren BABk 23.688 kontsulta burutu zituen 2015. urtean.

Bezeroentzako Arreta Bulegoa San Mameseko Geltoki Intermodalean dago, hots, Bizkaiko lurraldeko lotuneen arteko punturik garrantzitsuenetariko eta erabilienetariko batean. Arreta zerbitzua ematen du 08:30etik 19:30era, bai eta 946855000 telefono-zenbakiaren bitartez ere.

EranskinaTamaina
PDF icon oac_161025e.pdf47.1 KB
18/10/2016

Bizkaiko Garraio Partzuergoak metroko 1. lineako Urduliz-Plentzia ibilbideko bihurgune-tarte bat hobetuko du.

Bizkaiko Garraio Partzuergoko (BGP) Kontseilu Nagusiak, gaur goizean Bilboko egoitzan egindako bileran, bidearen plataforma berritzeko lehiaketarako adjudikazioa onetsi du, Metro Bilbaoko 1. lineako Urduliz-Plentzia ibilbideko tarte batean dagoena. Guztira, 557.893 euroko aurrekontua eta hiru hilabeteko epea izango ditu. Bertan jasotako jarduketak hiru motatakoak dira, baina oinarrian orain egoera txarrean dauden bidearen elementuei erreparatuko zaie. Hala, 1 km inguruko tartea eguneratu ahal izango da.

BGPko Kontseilu Nagusiak, gaurko bileran, Metro Bilbaoko garraio-eskaintza sortzeko tresna eguneratzeko eta hobetzeko adjudikazioa ere onetsi du, 374.016 euroren truke eta hamabi hilabeteko epean egiteko.

Eguneko erabaki garrantzitsuenen artean, BGPren eta Metro Bilbao SAren aseguruak kontratatzeko lizitazioa ateratzea dago. Aseguruak 1.950.000 eurokoak dira urtean. Poliza horiek betetzeko interesa duten enpresak Europako lehiaketa honetara aurkez daitezke, BGPk partzuergorako eta Metro Bilbao SArako batera onesten duen zenbateko horren arabera.

BGPko Kontseilu Nagusiak gaurko egunean onartutakoen artean, azkenik nabarmentzekoa da merkataritza-mailegu batzuen interes-tasak jaitsi direla. Horri esker, hemendik eta 2026ra bitartean 5 milioi euro aurreztuko dira. Merkatuan interes-tasak baxu daudenez gero, Kontseilu Nagusiak finantza-entitateekin sinatuta dituen maileguen baldintzak berriz ere beherantz negoziatzea onetsi zuen ekainean, eta, beraz, emaitza hori ekarri du.

EranskinaTamaina
PDF icon cg_161018.pdf50.91 KB
21/07/2016

BGPk, CAFek, Euskotrenek, Euskal Trenbide Sareak eta Metro Bilbaok trengintza hiztegi espezializatua prestatu dute, euskaraz, gaztelaniaz, ingelesez eta frantsesez; sektoreko 4.830 kontzeptu jasotzen ditu, eta Internet bidez kontsulta daiteke .

Hiztegia gaur aurkeztu dute, Bilbon, proiektuari lotutako erakunde eta enpresetako arduradunek. Elhuyar Fundazioaren Terminologia Sailaren lankidetzaz egin da.

Lan honen helburua izan da lau hizkuntzatan batzea sektorean erabiltzen diren terminoak eta jendearentzat eskuragarri jartzea.

Kontsultatu nahi duen edonorentzat eskuragarri egongo denez, hiztegi hau, trenbideen sektorearentzat ez ezik, itzulpengintzaren, kazetaritzaren eta hezkuntzaren sektoreentzat ere izango da baliagarria.

Halaber, proiektu honen bidez euskararen normalizazioa bultzatu nahi da. Lan honetan, euskara sektoreko terminologia dagoeneko zehaztuta duten beste hizkuntza batzuen maila berean jartzen da.

Eusko Jaurlaritzako Garraio sailburuordeak, Antonio Aizek, nabarmendu du hiztegia dela erakunde publikoen eta enpresa pribatuen arteko lankidetzaren emaitza; izan ere, “taldean lan egiten jakin dute, gizarteari nolabait sakabanatuta dagoen terminologiaren zati handi bat batzen duen tresna berria emateko”.

Jarraian, Leire Canciok, Elhuyarreko zuzendariak, Fundazioak hiztegigintzan eta hizkuntza-teknologien sektorean duen esperientzia nabarmendu du, eta azpimarratu du hau bezalako proiektuak “ekarpen garrantzitsua direla tokiko eremutik hizkuntza anitzeko ingurunera, eta euskararekin dagoen gizarte-konpromisoaren adibide direla”.

Azkenik, Garbiñe Alkizak, proiektuaren zuzendari teknikoak, hiztegi berriaren ezaugarri batzuk aurkeztu ditu, besteak beste, trenbideen sektoreko 4.830 kontzeptu jasotzen dituela, 15 arlotan sailkatuta.

Alkizaren iritziz, “ erabiltzeko hiztegia da”, aurretik CAFek egindako beste elebidun batean oinarritzen dena, bai eta proiektuan parte hartu duten erakundeen dokumentazioan erabiltzen den terminologian ere.

07/06/2016

220 ikaslek euren ikastetxeetako energia-kontsumoa %5ean murriztea lortu dute; aitortza jaso dute egindako lanagatik.

Lehen eta Bigarren Hezkuntzako ikasle horiek Aktibatu+ programaren laugarren edizioan parte hartu dute. Bizkaiko Foru Aldundiaren Aktibatu+ ekimenaren helburua da iraunkortasunaren alde herritarren parte-hartzea sustatzea, eta honakoen laguntzaz garatu da: Eusko Jaurlaritza, Bilbao Bizkaia Ur Partzuergoa, Bizkaiko Garraio Partzuergoa, Eroski Taldea eta Metro Bilbao.

Global Action Plan – Ekintza Globalerako Programa (GAP) ardatz hartuta, Nazio Batuek babestutako nazioarteko programa hau ikuspegi positibo, ideia arrunt eta ekintza praktikoetan oinarrituta dago.

Ikasleak Busturialdea-Urdaibai, Mungialdea, Txorierri, Erandio, Getxo eta Leioako 19 ikastetxetakoak dira, eta bi modulu landu dituzte: alde batetik, energia-kontsumoa murriztea helburu duena; eta, bestetik, hondakinen ekoizpena murriztea, horien kudeaketa hobetzea eta erosketa-irizpide iraunkorragoak ezartzea helburu duena.

EranskinaTamaina
PDF icon 070616activate_eu.pdf77.77 KB
03/06/2016

Lehenengo hiru hilabeteetan, kargatzeko 25.000 eragiketa baino gehiago egin zituzten erabiltzaileek sakelako telefonoen Barik aplikazioaren bitartez.

Bizkaiko Garraio Partzuergoaren (BGP) aplikazioarekin, PlayStore-n dagoena, informazioa kontsultatzeko 158.342 eragiketa eta kargatzeko 25.137 eragiketa egin ziren maiatzaren 31ra arte.

Abian jarri zenetik hiru hilabete igaro eta gero, Bizkaiko Garraio Partzuergoaren (BGP) “Barik NFC” aplikazioan, guztira, 25.137 kargatze egin dira. Gainera, 16.776 erabiltzailek dagoeneko “app” hori eskuratu dute, Android sistema-eragilean duten sakelakoetatik Barik txartela kargatzeko aukera ematen duena. Guztira, 158.342 informazio-kontsulta egin dira.

Egin diren 25.137 eragiketetatik 24.241 Barik diru-txartela kargatzeko egin ziren eta beste 896 Metro Bilbao, Bizkaibus edo Bilboko Bilbobus eta Artxandako funikularrerako hileko txartelak erosteko.

Martxoaren 1etik, hortaz, dagoeneko posible da Barik txartela sakelako telefono adimendun batetik kargatzea. Bizkaiko Garraio Partzuergoak (BGP) Google PlayStore-n aktibatu du “app” hori. Aplikazioan, denbora laburrean txartela kargatzeko milaka toki berri egon dira erabilgarri, aurretik Bizkaia osoan zehar zeuden 800 kargatzeko tokiez gainera (tabako-dendak, kioskoak, kutxazainak, geltokiak...). Aplikazio berriari esker, erabiltzaileak edozein Barik kargatu ahal izango du, nahi beste aldiz, edozein tokitatik eta eguneko edozein ordutan. Horrez gain, geratzen den saldoari, azken mugimenduei eta beste gauza askori buruzko informazioa lortu ahal izango du.

Ticketing sistemen eremuan izaten diren azken aurrerapen teknologikoak, pixkanaka, Bizkaian ezarri nahi ditu BGPk; hain zuzen, proiektua BGPren politika horren barruan sartzen da. Lortutako datuei erreparatuz gero, arrakasta handia izan duela esan daiteke; izan ere, hasierako espektatibak gainditu dira. Aplikazioa abian jarri aurretik, Barik txartelaren ohiko tokietan kargatu ahal ziren txartelak (Metro Bilbao, Euskotren, Euskotran, Renfe –FEVE barne-, Larreinetako funikularra, Artxandako funikularra, Bilbobus eta Bizkaibuseko kabinak, tabako-dendak, kioskoak, merkataritza lokalak eta BBK-ko kutxazainak); eta abendutik aurrera webgunean bertan (ctb.eus) ere egin daiteke. Une honetan, 1,4 milioi Barik txartel baino gehiago daude zirkulazioan.

Funtzionamenduari buruzko informazio gehiago: http://www.ctb.eus/app-barik-nfc

EranskinaTamaina
PDF icon 030616_barik_movil_eus.pdf67.51 KB
19/04/2016

3. lineako erabiltzaileek txartel bakarra ordainduko dute lur azpiko sarean egin behar dituzten joan-etorrietan.

BGPko Kontseiluak erabaki du Metro Bilbaoko 1 eta 2 lineek eta Euskotrenen 3. lineak zerbitzu bakar moduan funtzionatuko dutela herritarrentzat.

Bizkaiko Garraio Partzuergoak (BGP), Eusko Trenbideak (ET/FV) eta Metro Bilbaok egin duten akordioaren arabera, linea berria abian dagoenean txartel eta tarifa berberak erabiliko dira bi operadoreetan.

Bizkaiko Garraio Partzuergoko (BGP) Kontseilu Nagusia gaur eguerdian bildu da Bilbon, eta hartu duen erabakiaren ondorioz Metro zerbitzuaren hiri inguruko edozein lineatan mugitzen diren erabiltzaileei ez zaie ontzi-aldaketa aplikatuko. Hau da, 1., 2. edo 3. lineako edozein erabiltzailek bidaia bakarra ordainduko du, baldin eta bidaia hori hiri inguruko geltokien artean egin bada.

3. linea abian jarri eta azaldutako premisaren arabera ustiatu baino lehen, alabaina, erabaki batzuk hartu behar dira operadoreen tarifa-eskemari lotuta; izan ere, 2017. urtean abian jarriko den trazadura berri hori metroko beste linea bat izango da herritarrarentzat, bi operadore desberdinek ustiatzen badute ere. Hori da akordioaren ondorio garrantzitsuenetako bat. Alderdiek honako premisa adostu dute hasieran: 3. linea (San Antonio-Matiko) Metroaren beste linea bat izango da ondorio guztietarako, eta L1, L2 eta L3 lineen artean egiten den edozein bidaia Metroko bidaia bakar gisa hartuko da erabiltzailearentzat, hots, ontzi-aldaketarik egin ez dela ulertuko da.

Akordioaren bidez Bizkaiko Garraio Partzuergoak konpromiso gisa hartu du L3 linea abian jartzeari lotuta deskribatu diren ekintzak garatzeko Metro Bilbaoko eta Euskotreneko esparru guztietan behar diren ekipamenduaren eta sistemen erosketa eta hasierako egokitzapena finantzatuko dituela.

Bestalde, 28/040 eta 29/040 kilometro-puntuetan bide-plataforma berritzeko eta Plentziako geltokiko 2. bideko nasa luzatzeko lizitazioa onartu du Bizkaiko Garraio Partzuergoak. Urdulizko bidea lurperatzeko lanen ondorioz tarte horretan zerbitzurik ez dagoela aprobetxatuko da. Aurrekontua 777.719,19 euro da, eta lanak burutzeko epea 3 hilabetekoa.

Azkenik, BGPk Thales enpresari adjudikatu dio Urdulizko bidea lurperatzeko lanen ondorioz Metro Bilbaoko Aginte-mahai Zentralizatuan behar den softwarea egokitzeko zerbitzua, 280.890,61 eurotan eta sei hilabetetan burutzeko.

EranskinaTamaina
PDF icon linea3_190416_eus.pdf35.47 KB
01/04/2016

BGPk Barik txartelari buruzko informazioa emateko telefono-zenbaki berria aktibatu du

Bizkaiko Garraio Partzuergoak (BGP) 94 685 50 00 telefono-zenbakia kontratatu du eta horren bidez, herritarrek Barik txartelaren eta lurraldeko garraio publikoaren inguruko informazio guztia lortu ahalko dute.

94 probintzia-kodea daraman telefono-zenbaki hori aste honetan gehitu da BGPk San Mames geltoki intermodalean daukan bezeroei arreta emateko bulegoaren bidez herritarrei informazioa emateko zerbitzura. Horrela, Bizkaiko Batzar Nagusiek agindutakoa bete da.

Momentu honetan telefonia-enpresen kontratu gehienek telefono finkoetara doan deitzeko aukera barne hartzen dute eskaintza komertzialetan eta beraz, pauso hori emanez gero, herritarrek dirua aurreztuko lukete. BGPren informaziorako telefonoguneak 11.000 dei jaso zituen 2015ean.

Hasiera batean bi telefono-zenbakiak mantenduko dira hilabete batzuez, bai 901 123 123 eta bai 94 685 50 00, eta ostean 94 probintzia-kodea daramana bakarrik geldituko da.

EranskinaTamaina
PDF icon prentsaoharra_010416.pdf22.49 KB
01/03/2016

Barik txartela sakelako telefonoaren bidez kargatzeko BGPren “app”-ak 2.414 deskarga izan ditu egun bakarrean.

Aktibo egon den lehenengo egunean, Google PlayStore-n dagoen Bizkaiko Garraio Partzuergoaren (BGP) Barik aplikazioak guztira 2.414 deskarga izan ditu. Barik txartela kargatzeko aukera ematen duen “app” hori dagoeneko eskuratu duten erabiltzaileek 6.758 kontsulta eta kargatzeko 572 eragiketa egin dituzte Android 4 sistema-eragilea edo berriagoa duen smarthone batetik (563 Barik diru-txartelarenak eta 9 hileko txartelarenak). Eragiketa horien bidez 5.607,2 euro ordaindu dira.

Atzotik, beraz, dagoeneko posible da Barik txartela sakelako telefono adimendun batetik kargatzea. Bizkaiko Garraio Partzuergoak (BGP) Google PlayStore-n aktibatu du “app” hori. Aplikazioan, egun bakarrean txartela kargatzeko 2.414 toki berri egon dira erabilgarri, aurretik Bizkai osoan zehar zeuden 800 kargatzeko tokiez gainera (tabako-dendak, kioskoak, kutxazainak, geltokiak...). Aplikazio berriari esker, erabiltzaileak edozein Barik kargatu ahal izango du, nahi beste aldiz, edozein tokitatik eta eguneko edozein ordutan. Lehenengo egunean, BGPk ez du azpimarratzeko moduko gertaerarik erregistratu.

Partzuergoak aurreikusitakoaren arabera, garraio-txartelak “on line” kargatuko dira; horretarako, NFC (Near Field Communication) teknologia aktiboa duen sakelako telefono “adimentsua” erabili beharko da, eta ordainketa segurua egiteko atebidearen bitartez ordaindu beharko da. Beraz, erabiltzaileak edozein tokitatik handitu ahal izango du bere txartelaren saldoa, edo Barik-en sar daitekeen garraio-txartel bat erosi ahal izango du, kargatzeko saltoki fisiko batera joan beharrik izan gabe.

Funtzionamenduari buruzko bideoa: http://www.ctb.eus/sites/default/files/Barik2016Eusk.mp4

EranskinaTamaina
PDF icon 20160301_barik-movil_eus.pdf43.93 KB
26/02/2016

BGPk astelehenetik aurrera ezarriko du Barik txartela sakelako telefonoaren bidez modu masiboan kargatzeko sistema .

Otsailaren 29tik, astelehenetik, aurrera Barik txartela sakelako telefono adimentsuen bidez kargatu ahal izango da. Hasieran, Google PlayStore-n aurkitu ahal izango da BGPren aplikazioa eta soilik erabili ahal izango da Android 4.0 sistema eragilea edo hori baino berriagoa duten NFC teknologiadun “smartphone”-tan. Baina, gero, beste sistema eragile batzuetan ere erabili ahal izango da. Bizkaiko Garraio Partzuergoak (BGP) “app” berri bat aktibatuko du Google PlayStore-n, eta txartelak kargatzeko milaka toki zehaztuta egongo dira bertan. “ctb.eus” estekan sartuta ere eskuratu ahal izango da aplikazioa. Aplikazioari esker, erabiltzaileak edozein Barik kargatu ahal izango du, nahi beste aldiz, edozein tokitatik eta eguneko edozein ordutan. 740 erabiltzailek arrakasta handiz probatu dute sei hilabetean zehar (iazko uztailaren erditik aurrera) aplikazio esperimentala, proba pilotua egin zenean; baina, hala ere, erabiltzaile horiek proposatutako hobekuntza batzuk sartu ditu Garraio Partzuergoak. “App” berria azkarragoa izango da; sakelako telefonoen modelo gehiagotan erabili ahal izango da, bertsio elebiduna eskainiko du eta V.me by VISA bidez ordaintzeko aukera emango du. Partzuergoak aurreikusitakoaren arabera, garraio-txartelak “on line” kargatuko dira; horretarako, NFC (Near Field Communication) teknologia aktiboa duen sakelako telefono “adimentsua” erabili beharko da, eta ordainketa segurua egiteko atebidearen bitartez ordaindu beharko da. Beraz, erabiltzaileak edozein tokitatik handitu ahal izango du bere txartelaren saldoa, edo Barik-en sar daitekeen garraio-txartel bat erosi ahal izango du, kargatzeko saltoki fisiko batera joan beharrik izan gabe Ticketing sistemen eremuan izaten diren azken aurrerapen teknologikoak, pixkanaka, Bizkaian ezarri nahi ditu BGPk; hain zuzen, proiektua BGPren politika horren barruan sartzen da. Orain arte, Barik txartelaren ohiko tokietan kargatu ahal izan da txartela (Metro Bilbao, Euskotren, Euskotran, Renfe –FEVE barne-, Larreinetako funikularra, Artxandako funikularra, Bilbobus eta Bizkaibuseko kabinak, tabako-dendak, kioskoak, merkataritza lokalak eta BBK-ko kutxazainak); eta abendutik aurrera webgunean bertan (ctb.eus) ere egin daiteke. Gaur egun 1,3 milioi Barik txartel baino gehiago daude zirkulazioan, eta txartelak kargatzeko 800 puntu baino gehiago aurki ditzakegu Bizkaia osoan. Funtzionamenduari buruzko bideoa: http://www.ctb.eus/sites/default/files/Barik2016Eusk.mp4

EranskinaTamaina
PDF icon 260216_appnfcbarik_eus.pdf44.51 KB
16/02/2016

Mugi eta Bat txartelak Metro Bilbaon erabil daitezen onartu du BGPk.

Euskadiko Txartel Bakarra edukitzeko bideak aurrera egiten jarraitzen du. BGPren Kontseilu Nagusia gaur eguerdian bildu da, Bilbon, eta Mugi eta Bat txartelak Metro Bilbaon erabiltzeko hitzarmenak onetsi ditu. Izan ere, Mugi eta Bat Bizkaiko Barik-en “ahizpak” dira Gipuzkoan eta Araban.

Aurretik egin diren lan-bilerak Eusko Jaurlaritzak koordinatu ditu, eta orain, “contactless” delakoen jabetza duten erakundeak (Gipuzkoako Garraioaren Lurralde Agintaritza eta Euskotrenbideak sozietate publikoa, hau da, BAT txartela Araban kudeatzen duena) ados jarri dira; beraz, txartel horien dirudun modalitateak Bilboko metroan erabili ahal izango dira.

Barik, Mugi eta Bat txartelak hiru lurralde historikoetan erabili ahal izateko bidaia etengabean sartzen den urrats bat izan da hori. Hasieran, lehenengo fasean, proba pilotua egin zen; orduan, hiru txartelak erabili ahal izan ziren Bilbo eta Gasteizko tranbietan eta Larreinetako funikularrean. Baina urte honen erditik aurrera Metro Bilbao operadorean ere erabili ahal izango dira txartelak.

BGPk luzatu egingo du Eusko Trenbideak/FerrocarrilesVascos (ET/FV) entitatearekin sinatuta duen kontratu arautzailea, txartel turistikoa Bilbao Bizkaia Card txartelaren barruan ezartzeari buruzkoa. Beraz, martxoaren 1etik aurrera, txartel hori Euskotrenen erabili ahal izango da, Bilbo-Ermua eta Bilbo-Bermeo lineetan.

Bilbao Bizkaia Card txartela duen bidaiariak nahi beste bidaia egin ditzake txartelaren balio-denboran zehar (aldia egun batekoa, bikoa edo hirukoa da). Gaur egun Metro Bilbaon, Bilboko tranbian, Bizkaibusen, Bilbobusen eta Artxandako funikularrean erabil daiteke. Izan ere, 2015. urtean 11.596 bidaia egin ziren txartel horrekin, hau da, aurreko urtean baino hiru aldiz bidaia gehiago.

Bestalde, Partzuergoak erabaki du kontratu berri bi eskainiko dituela Urdulizko trenbide-pasagunea lurperatzen jarraitzeko eta lurpean geltoki berria eraikitzen jarraitzeko. Urdulizko geltokiko seinaleen, altzarien eta bulego teknikoaren proiektua onartu da, 528.077,71 euroko aurrekontuarekin hasieran, eta 4 hilabeteko burutzapen-epearekin.

Era berean, obra horren Gainegitura lanen barruan, Urdulizko geltokiko txartelak saltzeko eta balidatzeko sistemaren instalazioentzako lehiaketa atera du Partzuergoak, 156.453,05 eurotan eta fabrikatzeko eta instalatzeko 5 hilabeteko epearekin.

EranskinaTamaina
PDF icon 160216_cg_eus.pdf24.75 KB

Orriak