Metroa beti bezala ibiliko da, baina geltokia bost egunez egongo da itxita
Bizkaiko Garraio Partzuergoak (BGP) Getxoko Gobelako metro-geltokiko estalkia aldatzeko obrak hasiko ditu azaroaren 13an, astelehena. Lanak egiteko 6 asteko epea aurreikusi da eta 60.000 euroko aurrekontua. Hain zuzen ere, erabiltzaileak babesteko markesina dute xede.
Markesinak altzairuzko egitura nagusi bat dauka, eta bertatik hormigoizko plaka batzuk eskegiko dira. Berritzea erabaki da eguraldi txarraren ondorioz egoera txarrean dagoelako. Hori horrela, erdialdeko erreten bat egitea pentsatu da, euriaren ura ondo hustu dadin.
Lehenengo astean, azaroaren 13tik 18ra (06:00), geltokia itxi beharko da obrengatik, nahiz eta lanak gauez egingo diren. Aipatutako egunetan ezin izango da Negubide etorbidean aparkatu, ezta bertara sartu ere 23:00etatik 06:00etara.
Gogoan izan, geltokia itxita egon arren, trenak ohi bezala ibiliko direla. Gobelako geltokiko erabiltzaileek Areeta edo Neguriko geltokiak erabili beharko dituzte bost egun horietan.
