CTB-ek informatzen du

Bizkaiko Garraio Partzuergoak (BGP) beste aurrerapauso bat eman du garraio publikoaren digitalizazioan; izan ere, Bizkaiko herritarrei zuzendutako parte-hartze izaerako prozesu bat abiatu du, iPhone gailuetan erabiliko den Barik Mobile aplikazioaren etorkizuneko bertsioa hobetzeko. Ekimen horren bidez 500 pertsonako talde bat osatzea da asmoa, aplikazioa probatu dezaten App Store dendan behin betiko kaleratu baino lehen. Horretarako, parte-hartzaileek aplikazioa baldintza errealetan probatu ahal izango dute eta iradokizunak egin, aplikazioa argitara eman baino lehen hobekuntza-puntuak antzemateko. BGPk uste du pixkanakako ezarpen-eredu hori egokiena dela esperientziarik onena bermatzeko.

Barik Mobile aplikazioa BGPk garatu du eta Barik txartela mugikorrean eramateko aukera emango du garraio publikoan zuzeneko baliozkotzeak egiteko, euskarri fisikoaren beharrik izan gabe. 2025eko martxoan, Partzuergoak tresna hori gaitu zuen Android sistema erabiltzen dutenentzako, eta, oraingoan, iOS sistemarako garapenarekin, zabalkundea osatzea du helburu. Era berean, BGP lanean ari da Android bertsioa eguneratzeko, izan ere, aplikazio bakarrean bateratu nahi ditu gaur egun eskuragarri dauden funtzionaltasun guztiak, hartara, sistema integratuagoa, erosoagoa eta irisgarriagoa izan dadin. Ildo horretatik, laster, erabiltzaileek aplikazio bera erabilita kargatu ahalko dituzte tituluak, kontsultatuko dituzte mugimenduak eta kudeatuko dute txartelaren inguruko informazio guztia, iOS zein Android erabilita.

Aplikazioa probatzeko taldean parte hartu nahi dutenek barikctb@cotrabi.eus helbidera mezu bat bidalita eman dezakete izena, tokiak amaitzen diren arte, eta datu-pertsonalak (argazkia barne) eman beharko dituzte Bezeroen Arretarako Bulegoetan. Probak egiteko aldia irekita egongo da harik eta Bizkaiko Garraio Partzuergoak erabakitzen duen arte aplikazioak funtzionamendu-maila egokia lortu duela. Edozein titulu-mota —Creditrans edo Gizatrans diru-tituluak eta aldi baterako Bidai edo Gazte tituluak— dutenek erabili ahalko dute aplikazioa, betiere aurretiaz Barik txartel pertsonalizatua bazuten edo beren datuak BGPren Bezeroen Arretarako Bulegoetan erregistratu badituzte. Betekizun teknikoei dagokienez, aplikazioaren funtzio orokorrak bateragarriak izango dira gutxienez iPhone 7 mugikorra daukaten eta iOS 13 bertsioa darabilten gailuekin; aitzitik, bidaiak baliozkotu ahal izateko, erabiltzaileek iPhone XS bat izan beharko dute gutxienez, iOS 17.4 bertsioarekin edo hori baino berriagoa den bertsioarekin.

Probak egiteko fasea amaitutakoan eta aplikazioa optimizatuta dagoenean, BGPk ofizialki argitaratuko du App Store dendan, eta horren berri emango du behar bezala. Erabiltzaileek erabaki beharko dute euskarri tradizionala edo digitala erabili nahi duten.

Bihar sartuko da indarrean partzuergoko tituluetako tarifen urteko eguneraketa. BGPren kontseiluak otsailaren 5ean onetsi zuen eguneraketa eta batez beste % 3ko igoera izango du. Zehazki, Barik Kide edo Giza txartelekin egindako bidaien balioa 3 zentimo inguru handituko da, eta aldizkako tituluek 10 zentimoko igoera izango dute.

BGPk azpimarratzen du eguneraketa horrek kalitatezko garraio publikoaren sistema eraginkorra eta jasangarria bermatzeko konpromisoari erantzuten diola, aldi berean herritarrentzako prezio irisgarriak mantenduz. Neurri horiekin, Bizkaiak mugikortasun-eredu bidezkoago baten aldeko apustua berresten du, eguneroko joan-etorriak erraztuko dituena eta erabiltzaile guztien bizi-kalitatea hobetzen lagunduko duena.

.

Bizkaiko Garraio Partzuergoak (BGP) gaur egun Bizkaian indarrean dauden garraio publikorako hobari-neurriak 2026ko abenduaren 31ra arte luzatzea erabaki du gaur. Zehazki, hauek dira mantenduko diren neurriak: 14 urtera arteko adingabeentzako doako garraioa, Gazte tituluen tarifan ezarritako % 50eko deskontua eta % 40ko hobaria gainerako bidaia anitzeko titulu eta abonuetan.

Kontseiluan azaldu dutenez, luzapen horren helburua da, batetik, gaur arte onetsitako errege dekretuetan ezarritako garraio publiko kolektiboa babesteko neurriei jarraipena ematea eta, bestetik, Bizkaiko erabiltzaileek 2026an ere tarifa merkeagoak izan ditzaten bermatzea.

Tarifen eguneraketa
Horrez gain, urtero bezala, BGPk partzuergoko tituluen tarifak eguneratzea onetsi du, batez besteko % 3ko igoerarekin. Horiek horrela, Barik edo Gizatrans txartelekin egindako bidaien balioa 3 zentimo inguru handituko da, eta aldizkako tituluek 10 zentimoko igoera izango dute.

BGPk azpimarratzen du eguneraketa horrek kalitatezko garraio publikoaren sistema eraginkorra eta jasangarria bermatzeko konpromisoari erantzuten diola, aldi berean herritarrentzako prezio irisgarriak mantenduz. Neurri horiekin, Bizkaiak mugikortasun-eredu bidezkoago baten aldeko apustua berresten du, eguneroko joan-etorriak erraztuko dituena eta erabiltzaile guztien bizi-kalitatea hobetzen lagunduko duena.

Bizkaiko Garraio Partzuergoak (BGP) amaitu du gaurtik aurrera Bizkaiko hiri barruko eta hiriarteko autobusetan, eta baita Bizkaia Zubian eta Artxandako funikularrean ere, MUGI txartela erabiltzeko aukera ematen duen garapena. Horrela, lurraldeen arteko garraio publikoaren sistemaren elkarreragingarritasuna zabaltzen da eta Bizkaian MUGI txartelaren erabilera bideratzen da.

Garraiobide berri horiek sartzeak Bizkaiko garraio-sistemaren elkarreragingarritasuna burutzea ekarri du, bai eta dauden hiru garraio-txartelak (BAT, BARIK eta MUGI), bana lurralde bakoitzeko, euskal garraio publikoaren sare osoan berdin erabiltzeko aukera ematen duen egokitzapena ere. Proiektua hainbat erakunde eta operadoreren lankidetzari esker gauzatu ahal izan da.
Ildo horretatik, MUGI honako operadore hauetan erabili ahal izango da: Bizkaibus, Bilbobus, Kbus (Barakaldo), Lejoan Busa (Leioa), Galdabusa (Galdakao), Etxebarri Bus, Erandio Busa, Sopelbus (Sopela), Artxandako funikularra eta Bizkaia Zubia. Bizkaia Zubiko ontziskan eta Portugaleteko Boteetan laster aktibatuko da Mugi erabiltzeko aukera. Derrigorrez gogorarazi behar da Metro Bilbaok dagoeneko onartzen duela Mugi txartela, Bizkaiko garraio publikoaren sistemaren barruan erabiltzeko aukerak zabalduz.

Sistemak operadore bakoitzari dagokion Creditrans diru-tarifa aplikatuko du eta barne hartuko du Familia Ugariaren profilen aintzatespena. Gainera, txartelak BARIK txartelaren baliokide gisa funtzionatuko du, erabilera-esperientzia homogeneoa bermatuz.

Operadore guztietan, Bizkaibusen eta Erandio Bus zerbitzuan izan ezik, balidazioa bakarrik egingo da ibilgailura sartzerakoan.

Hedapen hau urrats erabakigarria da Bizkaian eta EAE osoan garraio publikoa erabat integratzeko bidean. Lurralde kohesionatuagoa lortzen laguntzen du, lurraldeen arteko joan-etorriak errazten ditu eta garraio publikoa erabiltzean erabiltzaileen esperientzia hobetzen du.

BGPren 2026rako aurrekontua
BGPren Kontseilu Nagusiak gaur egindako bileran hasieran onartu da Partzuergoaren 2026ko aurrekontu orokorra, 237.530.000 eurokoa dena.

Kontu horietan garraio publikoaren azpiegiturak eta sistemak hobetzeko eta modernizatzeko hainbat inbertsio sartzen dira. Jarduketa garrantzitsuenen artean honako hauek daude: telebista-zirkuitu itxien sistema (TZI) eta bidaiariari informazioa emateko sistema eraberritzea (1,8 milioi), Kabiezesko azpiestazioaren behin betiko eraldaketa (1,4 milioi), Erandio eta Lutxana arteko trenbidea berritzea (milioi 1), baita ATP/ATO seinaleztapen-sistemaren zaharkitzea arintzera bideratutako hainbat esku-hartze ere (9 milioi). Halaber, Urbinagako zubibidearen egitura konpontzea (956.500 euro), Ibarbengoako aparkalekuan planta fotovoltaiko bat jartzea (940.600 euro) eta Urbinagako aldageltokia garatzea (363.000 euro) aurreikusten da.

Era berean, aurrekontuan ekipamendu teknologiko berria sartzea aurreikusten da (hala nola QR eta EMV sistemak, balidagailuak, bizikleten aparkalekuak), erabiltzaileen esperientzia hobetzen jarraitzeko eta garraio-sistemaren digitalizazioan aurrera egiteko asmoz.

.

Bizkaiko Garraio Partzuergoak (BGP) aurtengo bigarren seihilekorako onartutako hobari-neurriak 2026ko otsailaren 20ra arte luzatzea erabaki du gaur. Honako hauek dira:

• 14 urtera bitarteko haurrek doan bidaiatzea
• Gazte tituluen tarifan % 50eko deskontua
• Gainontzeko bidaia ugariko abonu eta txarteletan % 40ko deskontua

Kontseiluan adierazi duten bezala, helburua da zenbait errege-dekretutan hiriko eta hiriarteko lurreko garraio publiko kolektiboaren inguruko neurrientzako aurreikusitako aldiak betetzea BGPk araututako txarteletan.

Hortaz, erabakiak Partzuergoko txarteletan eragina izango du 2026ko urtarrilaren 1a eta 2026ko otsailaren 20a bitarteko aldian, ezarpena urtebetez bete dadin.

Bizkaiko Garraio Partzuergoak (BGPk) gogorarazten du % 45eko eta gehiagoko desgaitasuna edo mendekotasun-mailaren bat dutela egiaztatzen duten pertsonek eskubidea dutela garraio publikoan laguntzaile batekin bidaiatzeko, azken horrek bidaia-txartela ordaindu beharrik gabe.

Neurria joan den uztailean sartu zen indarrean; hala ere, espero baino motelago ari da ezartzen. Baldintzak betetzen dituzten 18.826 pertsonetatik soilik 536k —% 3 baino gutxiago— eskatu dute txartela aktibatzea. BGPren gogorarazpenarekin batera, Gizarte Ekintzako Foru Sailak gutun izendun bana bidali die onuradunei, neurriari buruzko informazioa jaso dezaten eta, bereziki, gida baten bidez berau eskatzeko jarraitu beharreko urrats guztiak ezagutu ditzaten.

Horretarako, BGPren, Metro Bilbaoren, EuskoTrenen, Bilbobusen, Bizkaibusen edo Renferen jendearentzako arreta-bulego batera joan beharko dute beren Barik txartel pertsonalizatuarekin; txartel hori ez badute, une horretan bertan eskatu ahal izango dute bulegoan.

Eskaera norberak egin dezake, NANa aurkeztuta, edo beste pertsona batek. Azken kasu horretan, ondokoa aurkeztu beharko da: titularrak sinatutako baimena, bien NAN originalak eta, eskatzaileak oraindik Barik pertsonalizaturik ez badu, argazki bat. Dokumentazioa egiaztatu ondoren, bulegoko langileek txartela gaituko dute laguntzaileari dagokion salbuespenarekin.

Laguntzailearekin bidaiatzeko, onuradunak bi aldiz jarraian pasatu beharko du bere Barik txartel pertsonalizatua baliozkotze-puntuan. Bigarren paseak ez du inolako kosturik izango, eta, horrela, laguntzailearen doako bidaia bermatuko da.

Bizkaiko Garraio Partzuergoak (BGP) beste urrats bat eman du erakundeak mugikortasun jasangarriaren alde egin duen apustuan, kasu honetan disuasio-aparkalekuetako hirutan ibilgailu elektrikoak kargatzeko guneak jarriz: Etxebarri, Leioa eta Ibarbengoa. Hiru aparkaleku horiek Metro Bilbaok kudeatzen ditu; BECen dagoen laugarren aparkalekua Bilbao Exhibition Centrek kudeatzen du eta dagoeneko 27 karga-puntu ditu. Ekimen honek indartu egiten du BGPk ingurumenarekin eta ibilgailu elektrikoaren eta garraio publikoaren erabilera konbinatuaren sustapenarekin duen konpromisoa.

Karga-puntu berriak estrategikoki kokatuta daude Bilboko Metropoliko Trenbidearen funtsezko hiru geltokietako aparkalekuetan eta joan-etorriak metroz egiten dituzten bitartean erabiltzaileei ibilgailu elektrikoa kargatzen uzteko aukera ematen diete.

• Etxebarri: 3 karga-puntu bikoitz, horma-kargagailuen bidez.
• Leioa: zoru-kargagailuen bidez birkargatzeko 4 puntu bikoitz, markesinaren azpian kokatuta eta arku metalikoekin babestuta.
• Ibarbengoa: -1 solairuan horma-kargagailuen bidez birkargatzeko 4 puntu bikoitz, berdez seinaleztatuta egoteagatik erraz identifika daitezkeenak.

Kargatzeko zutoin bakoitzak 22 kW-eko bi konexio-puntu ditu, baterien karga azkarra ahalbidetuz. Ezaugarri teknikoen artean hauek nabarmentzen dira:

• 400 V-eko elikadura trifasikoa.
• Guztira 44 kW-eko potentzia.
• 2 motako konektoreak eta pantaila eleaniztuna, euskaraz, gaztelaniaz eta ingelesez.
• Karga-egoeraren LED seinalea.

Kargaren kudeaketa iOS eta Android gailuetarako eskuragarri dagoen EVcharge aplikazio mugikorraren bidez egiten da. App-ak aukera ematen dio erabiltzaileari eskuragarri dauden puntuak aurkitzeko, karga aktibatzeko, prozesua denbora errealean jarraitzeko eta ordainketak modu errazean egiteko. Zutoin bakoitzak QR kode bat du, aplikazioan sartzea eta konfigurazioa errazten duena.

Tarifa-politikari dagokionez BGPk bilketa ez lehenestea erabaki du, kWh-ko prezio lehiakorrarekin eta energia-kostuari egokituta, aparkalekuen eta garraio publikoaren erabilera sustatzeko helburuarekin. Neurri hau hurbileko elektrolindegietako tarifen azterketan oinarritzen da, etekin ekonomikoaren aurretik zerbitzua lehenetsiz.

Jarduketa honekin BGPk mugikortasun jasangarriagorantz eraldatzeko funtsezko eragile gisa duen eginkizuna indartzen du, intermodalitatea bideratuz eta hiri-garraioan trantsizio energetikoa babestuz.

Neurri horren aplikazioaren inguruan sortutako zalantzak ikusita, Garraio eta Mugikortasun Jasangarriko Ministerioak argitu du doakotasuna luzatuko dela erabiltzaileak hamalau urte betetzen dituen urteko abenduaren 31ra arte, hau da, hamabost urte bete arte.

 Onura hori lortzeko, ezinbestekoa izango da Barik txartel pertsonalizatua izatea, gaur egun hamabi urtetik beherakoentzat eskatzen den bezalaxe. Eskaerak BGPren, Metro Bilbaoren, Bizkaibusen, EuskoTrenen Bilbobusen eta Renferen aurrez aurreko arreta emateko bulegoetan egin daitezke dagoeneko. Izapidea amak, aitak edo legezko tutoreak egin behar du, adingabearen argazkia eta NANa edo familia-liburua aurkeztuta. 

Bizkaiko Garraio Partzuergoak (BGP) Errege Lege Dekretu hori aplikatzea onartu zuen joan den urtarrilaren 7an egindako Administrazio Kontseiluan. 

Adingabeentzako doakotasunaz gain, araudiak beste abantaila batzuk ere baditu Bizkaiko garraio publikoaren erabiltzaileentzat:

 • % 50eko deskontua gazteentzako abonuetan, Estatuak osorik finantzatuta.

 • % 40eko deskontua gainerako abonu eta bidaia anitzeko tituluetan, finantzaketa partekatuarekin: % 20 Estatuak estaltzen du, eta beste % 20 BGPren (% 10) eta Eusko Jaurlaritzaren (% 10) artean banatzen da. 

Neurri horiek lurraldean mugikortasun irisgarriagoa, bidezkoagoa eta jasangarriagoa sustatzeko konpromisoaren parte dira.

450 gune baino gehiagok, kalean bertan, Euskadin dagoeneko "LGTBI+ points sarea" osatzen dute, Ortzadar LGBTI+ek abian jarritako LGBTI+ Puntu Seguruen Sarea, Eusko Jaurlaritzaren lankidetzarekin. Sareak ingurune seguruak, errespetuzkoak eta solidarioak eskaini nahi ditu LGBTI+ pertsonentzat, arreta berezia jarriz trans pertsonen babesean.

Sare horri atxikitako gune guztiek jarraibide argiak eta adostuak jasotzen dituzte Ertzaintzarekin, eraso-egoera baten aurrean edo laguntza-eskaera baten aurrean jarduteko. Oinarrizko printzipioen artean honako hauek nabarmentzen dira: lasaitasuna mantentzea, biktimaren kontakizuna zalantzan ez jartzea eta haren erabakiak errespetatzea. Gainera, argibide praktikoak ematen dira kaltetuei laguntzeko moduari buruz, eta, beharrezkoa bada, senideekin, larrialdi-zerbitzuekin edo erakunde-baliabideekin harremanetan jartzen dira.

Establezimenduak ezagutzeko, ikurra egongo da agerian.

Informazio gehiago: www.lgbtipointssarea.eus

.

Bizkaiko Garraio Partzuergoak (CTB) Barik Mobile zerbitzua aktibatu du, txartel digitala deskargatu eta garraio publikoan egindako bidaiak mugikorrarekin ordaindu ahal izateko. Oraingoz, Android sistema eragilearekin soilik erabil daiteke aplikazioa, baina Apple-ekin lanean ari gara urtearen amaieran Iphone gailuetan ere aktibatzeko. Zerbitzu hori baliatu ahal izateko, beharrezkoa izango da Google Play Store-n aplikazioa deskargatzea eta NFC teknologia duen gailu bat izatea.

Erabiltzaileek Barik txartel pertsonalizatua izan beharko dute —alde batera utzita diru-zorroaren titulua ala aldi baterako txartela erabiltzen duten—, eta 65 urte baino gutxiago eta 15 urte baino gehiago izan beharko dituzte. BPGk proba pilotu bat hasi zuen 2020an 26 urtetik beherako gazteekin, eta orain 65 urte baino gutxiagoko adina dutenei ere zabaldu die aukera; horrenbestez, Gizatrans titulua dutenek hilabete batzuk itxaron beharko dute oraindik Barik Mobile erabili ahal izateko.

Txartel digitala garraio publiko guztietan erabili ahal izango da, Renfen, Bizkaia Zubian (igarotzeko plataforman), Portugaleteko txalupetan eta Metro Bilbaoren Etxebarriko, Leioako, Ibarbengoako eta BECeko autoetarako disuasio-aparkalekuetan izan ezik, horietan txartel fisikoa erabiltzen jarraitu beharko baita espazio horietako makinak egokitu arte.

Barik Mobile aplikazioak informazio zehatza jasotzen du, hala nola egindako azken mugimenduak, kargaren egiaztagiriak, MovEuskadi bidaien planifikatzailea, Bizkaiko garraioaren mapa eta Barik sistemaren informazio guztia. Horretarako, alta eman beharko da, eta BPGren aplikazioan eta webgunean sartzeko erabiltzailea eta pasahitza sartu beharko dira. Halaber, tituluak kargatu eta aldi baterako tituluen eremuak handitu ahal izango dira aplikaziotik bertatik.

Edozein Barik txartel anonimo pertsonalizatzeko aukera dago garraio-operadoreen Jendearen Arretarako bulegoetan; horrez gain, webgunerako sarbidea aktibatuko da bertan.

Informazio gehiago BGPren webgunean - https://bit.ly/4c0mJFF -, 900 840 655 telefonoan eta email barikctb@cotrabi.eus

Bizkaiko Garraio Partzuergoak (BGP) bere lehen disuasio-aparkalekua jarri du martxan Leioako metro-geltokian. Azpiegitura berri horren helburua da herritarrak metro-geltokietara bizikleta pribatuan eta patinetean joan daitezen sustatzea, ondoren metroa lasai asko har dezaten, jakinik haien jabetza eguraldi txarretik eta balizko kalte edo lapurretetatik babestuta dagoela. Azpiegitura berriak erabilera pribatuko hogei bat bizikleta eta patinete hartzeko lekua du, aldundiaren Bizkaibizi zerbitzuaren (herriarteko bizikleta publikoak) osagarria baita.

Datozen hilabeteetan Ansio eta Ibarbengoako geltokietan bizikletetarako beste bi aparkaleku irekitzeko asmoa du BGPk, ibilgailuen aparkalekuak dauden lekuetan. Gerora, aparkalekuak pixkanaka zabalduko dira Plentzia, Urduliz, Sopela, Algorta eta Etxebarri udalerrietara, baita Bilboko zenbait geltokitara eta hiriguneetara ere.

Bizikleten aparkalekura sartzeko eta bertatik irteteko, barik pertsonalizatua eduki behar da; horrela, azpiegituraren sarrera eta irteera guztiak erregistratuta geratuko dira. Barruan, erabiltzaileak bere bizikleta edo patinetea giltzatuko du, eta, garraio publikoa erabiltzen duen bitartean, bateriak kargatzeko aukera izango du horretarako prestatutako entxufeetan.

Aparkalekua erabiltzeko, gutxienez bidaia bat egin beharko da metroz. Azpiegituraren ordutegia Metro Bilbaok zerbitzua emateko ezarritako berbera izango da; hau da, ezin izango dira ibilgailuak ezarritako ordutegitik kanpo utzi edo jaso. Prezioa doakoa izango da zerbitzua ezagutu arte, eta, ondoren, prezio sinbolikoa aplikatuko zaie erabiltzaileei.

Bizikleta edo patinetea aparkatzeko gehieneko denbora ondoz ondoko lau egunekoa izango da. Denbora hori igarotakoan, BGPk ibilgailua eraman ahal izango du, giltzarrapoa deuseztatu ondoren, aparkalekua libratu eta beste pertsona batek erabili ahal izan dezan. Hamabost egun igarotzen badira jabeak ibilgailua erreklamatu gabe, irabazi-asmorik gabeko gizarte-erakunde bati emango zaio. Horrez gain, isunak edo zaintza-kostuak ezarri ahal izango dira azpiegitura behar ez bezala erabiltzeagatik.

Guztira 12 urtetik beherako 33.441 adingabek dagoeneko badute beren barik txartel pertsonalizatua, lurraldeko garraio publikoetan doan bidaiatzeko aukera ematen diena, Bizkaiko Garraio Partzuergoak neurria onartu zuenetik lehen hilabetea bete denean.
Tarjetas de menores de 12 años.

Nahiz eta 12 urtetik beherakoentzako doakotasuna urtarrilaren 30ean jarri zen abian, lehen aurreikuspenei aurrea hartuta, erabiltzaileek urtarrilaren 8tik aurrera izapidetu zezaketen titulua. Egun horretatik joan den ostiralera arte, hau da, otsaileko azken egunera arte, 23.063 adingabek eskuratu dute titulua. Kopuru horri gehitu beharko litzaizkioke dagoeneko operatibo zeuden 12 urtetik beherakoen 10.378 titulu, beraz, 33.441 dira guztira.

Hamabi urtetik beherakoentzako barik txartel pertsonalizatua BGPren, Metro Bilbaoren, Bizkaibusen, EuskoTrenen edo Bilbobusen aurrez aurreko arreta emateko bulegoetan eskuratu daiteke. Txartela izapidetzeko, beharrezkoa izango da tutore batek adingabearen argazki bat eranstea NANarekin edo familia-liburuarekin batera.

Hilabete honetan, Termibuseko (BGP), Zazpi Kaleetako (Metro Bilbao) eta Ansioko bulegoetan izapidetu dira eskaera gehien, eta, ondoren, Areeta eta Zazpi Kaleetako (EuskoTren) bulegoetan.

12 urtetik beherakoen txartelak, 25-01-08tik 25-02-28ra egindakoak: 23.063

MB ZAZPIKALEAK BAB: 4.012
TERMIBUS BAB: 3.246
MB ANSIO BAB: 3.205
MB AREETA BAB: 2.887
ET ZAZPIKALEAK BAB. 2.532
BILBOBUS BAB. 1.783
PORTUGALETE BAB: 1.644
RENFE BAB : 1.307
ET DURANGO BAB: 1.170
ET GERNIKA BAB: 834
SODUPE BAB:: 251
EHU BAB: 192

Joan den urteko abenduaren 23an, Euskadiko Garraio Agintaritzaren bileran, Bizkaiko Foru Aldundia prest agertu zen neurria aurrera eramateko, eta, beraz, urtarrilaren 7an, Bizkaiko Garraio Partzuergoak Ezohiko eta Presazko Kontseilua egin zuen, erabakia hartu eta izapidetzeko.

Bost egunez jendaurrean jartzeko epea bete ondoren, eta legezko izapideak gainditu eta sistema teknikoak egokitu ondoren, azkenean doakotasuna eraginkorra izan zen urtarrilaren 30etik aurrera.

Bizkaiko Garraio Partzuergoaren Kontseilu Nagusiak gaur arratsaldean egindako saioan onetsi du ekainaren 30era arte luzatzea bidaia anitzeko tituluen eta diru-zorroen (barik, creditrans, gizatrans eta aldi baterako kide eta gazte tituluak) % 50eko dirulaguntzak. Neurriak Kontseiluaren babesajaso du, aurreko Errege Dekretuan jasotako deskontuak oraindik indarrean zeudenean.

Horiek horrela, BGPk hartutako erabakiaren bidez etenik gabe luzatu dira laguntzak urtarrilaren 28ko 1/2025 Errege Lege Dekretuan jasotako neurriak indarrean sartuko diren egunera arte; neurri horiek ere BGPren Kontseiluak bozkatu eta onetsi ditu gaur, eta aurtengo abenduaren 31ra arte luzatuko dira.

Horrenbestez, uztailaren 1etik aurrera, Bizkaiko garraioaren doakotasuna 14 urtetik beherakoei zabalduko zaie; % 50eko deskontua aplikatuko zaie gazteentzako tituluei (gazte) eta % 40koa gainerako tituluei.

Azkenik, BGPk partzuergoko tituluen tarifak eguneratzea onetsi du, batez besteko % 3,4ko igoerarekin.

Bihartik aurrera, Bizkaiko garraio publikoa doakoa izango da 12 urtetik beherakoentzat, operadoreetan egokitzapen teknikoa egiteko proba guztiak gainditu ondoren eta neurria Bizkaiko Aldizkari Ofizialean gaur argitaratu ondoren. Izan ere, Metro Bilbaok, Bizkaibusek, EuskoTrenek eta Bilbobusek lan handia egin dute neurria ezartzeko aurrez ikusitako data aurreratzeko, otsailaren lehen astean ezartzekoa baitzen.

Roberto Muñoz Bizkaiko Garraio Partzuergoko zuzendari kudeatzaileak azaldu duenez, areagotu egin dituzte probak eta egokitzapen teknikoa, garraio publikoa gutxienez astebete lehenago izan dadin doakoa 12 urtetik beherakoentzat. Esan duenez, berri ona da garraio publikoaren erabilera sustatzen duelako. Errealitate hori lortzeko beste urrats bat da.

12 urtetik beherakoentzako barik txartel pertsonalizatua CTBren, Metro Bilbaoren, Bizkaibusen, EuskoTrenen, Renferen edo Bilbobusen aurrez aurreko arretarako bulegoetan eska daiteke. Txartela izapidetzeko, tutore batek adingabearen argazki bat erantsi behar du, NANarekin edo familialiburuarekin batera.

Bizkaiko Garraio Partzuergoaren Kontseilu Nagusiak zenbait neurri onetsi ditu gaur, Bizkaiko lurraldeko hobariekin lotuta. Neurri horien artean 12 urtetik beherakoentzako garraio publikoaren doakotasuna nabarmentzen da.

Neurria otsailaren lehen astetik aurrera aktibatuko da eta Barik txartel pertsonalizatua beharko da berau baliatzeko. Txartel hori BGPren, Metro Bilbaoren, Bizkaibusen, EuskoTrenen, Renferen edo Bilbobusen Bizkaiko garraio publikoaren bulegoetan eskatu
ahal izango da. Txartel hori lortzeko, adingabeak tutore batekin bertaratu beharko dira, NAN eta/edo familia-liburu eta guzti.

Horrez gain, abenduaren 23ko 9/2024 Errege Lege Dekretuan jasotako neurriak jorratu dira, Espainiako Gobernuak garraio publikoari emandako hobariari dagokionez.

2025eko lehen seihilekoan:
2024. urtean zehar indarrean egon diren neurriak luzatuko dira, hau da, % 50eko hobariak emango dira abonuetan eta bidaia anitzeko titulu guztietan, eta 12 urtetik beherakoek doan bidaiatu ahalko dute.

Bigarren seihilekotik aurrera (2025eko uztailaren 1etik aurrera), honako neurri hauek sartuko dira indarrean:
- % 40ko deskontua abonuetan eta bidaia anitzeko tituluetan.
- % 50eko deskontua gazteentzat (26 urtetik beherakoentzat).
- 0 eta 14 urte bitartekoek doan bidaiatuko dute.

BGPren kontseiluan aztertu den beste gaietako bat ekitaldi honetarako tarifa berrien egokitzapena izan da: otsailaren 20tik aurrera aplikatuko dira eta % 3,4ko batez besteko igoera izango dute.

Gehien erabiltzen den Creditrans txartelak % 3ko batez besteko igoera izango du, hau da, eurotan 3 zentimoko igoera; Gizatrans txartelak edo 65 urtetik gorakoenak, berriz, 2 zentimo egingo du gora.

Partzuergoko tituluen tarifak 2022an igo ziren azken aldiz. Data horretatik 2024ko azarora, KPIa % 11,7 igo da.

Azkenik, Kontseilu Nagusiak Garraio Partzuergoaren 2025erako aurrekontuak onartu ditu.

Horrela, Bizkaiko Garraio Partzuergoak (BGP) eta Euskotrenek, BATen kudeatzaileak, txartelaren elkarreragingarritasuna burutzen dute Metro Zerbitzuan (1, 2 eta 3 lineak), Euskotrenen, Bilboko Tranbian eta Larreinetako Funikularrean ezarri ondoren. Datorren asteartetik aurrera, bidaiariek Bizkaiko autobusetan (Bizkaibus, Bilbobus, Sopelbus, Etxebarri Bus, Erandio Busa, Kbus, Lejoan Busa, Galdabusa), Bizkaiko Zubian, Artxandako Funikularrean eta Ereagako igogailuan ere erabili ahal izango dute.

Horretarako, BGPk dagokion kontratuaren lizitazioa eta izapideak egin ditu, eta, BAT txartelaren elkarreragingarritasuna baimentzeko beharrezkoak diren garapen-lanak egin ditu.

Garraio berri horiek sartzea beste urrats bat da Bizkaiko garraioen elkarreragingarritasunean aurrera egiteko, bai eta dauden hiru garraio-txartelak -BAT, BARIK eta MUGI, bat lurralde bakoitzeko- Euskal garraio publikoaren sare osoan berdin erabili ahal izateko. Proiektu hori erakunde eta operadore askoren arteko lankidetzari esker burutu da.

-