CTB-ek informatzen du

Abuztuan ere, irekita egongo dira Bizkaiko garraio partzuergoaren arreta emateko bulegoak Bizkaiko garraio publikoari buruzko kontsulta guztiak argitu eta erantzun ahal izateko, Barik txartelaren kudeaketak barne. Hauexek izango dira ordutegiak: BGP-San Mames / Bilbo: San Mameseko geltoki intermodala

   Astelehenetik ostiralera, lanegunetan, 08:30etik 07:30era (Aste Nagusiko ostiralean itxita egongo da)

Metro Bilbao/Euskotren Bilbo: ZazpiKaleak geltokia-Alde Zaharra (sarrera: S. Nikolas)

   Astelehenetik ostiralera, lanegunetan, 08:00 - 15:00 (Aste Nagusiko ostiralean itxita egongo da)

Renfe Bilbo: Plaza Biribila 2 (Abandoko geltokia)    Astelehenetik ostiralera, lanegunetan, 08:00 - 14:00 (Aste Nagusiko ostiralean itxita egongo da)

Bilbobus Bilbo: Poza lizentziatuaren kalea (Elcanorekin) 6

   Astelehenetik ostiralera, lanegunetan, 08:00 - 15:00 (Aste Nagusiko ostiralean itxita egongo da) Larunbatetan 09:00etatik 14:00etara

Bizkaibus Portugaleteko Herritarrei Arreta emateko Bulegoa.San Roke plaza     Astelehenetik ostiralera, lanegunetan: 07:30 - 15:00 (Aste Nagusiko ostiralean itxita egongo da)

Sodupeko udal-bulegoak. Galarraga zeharbidea 20    Astelehenetik ostiralera, lanegunetan : 07:30 - 15:00

Euskotren

   Durangon: Geltoki kalea 08:00 - 15:00 Astelehenetik ostiralera, lanegunetan

   Gernika Geltokiko plaza, z/g behea. 8:00 - 15:00

Horrez gain Bizkaiko Garraio Publikoaren 94 685 5000 telefono-zenbakian erantzungo dizuegu ordutegi honetan: astelehenetik ostiralera, lanegunetan, 08:00etatik 20:00etara, eta larunbatetan, lanegunak badira, 09:00etatik 15:00etara.

Bizkaiko erakundearen eta Kataluniako entitate publikoaren arteko lankidetzari esker, “T Mobilitat” proiektua abian jartzeko laguntza izango dute. Hain zuzen ere, Kataluniako lurralde osoan garraioa kudeatzeko sistema teknologiko eta tarifario berri bat ezartzean datza.

Carme Fábregas, ATMko Sistemak eta Berrikuntza burua: “Berrikuntza ikaragarria da, eta Bartzelonaz gain munduko beste hiri batzuetan ere egokitzat jotzen dute, hala nola Dubain. Hori dela eta, Bilbo erreferentzia izango da mundu osoan”.

Espainiako Patenteen eta Marken Bulegoak iaz aitortu zuen patenteak Bizkaiko Garraio Partzuergoari ematen dio abala, I+G+b eremuan aitzindaria, berritzailea eta abangoardista dena; hori guztia, garraio publikoaren bidez Bizkaia gero eta hobeto lotu eta kohesionatzeko helburuarekin.

“Barik NFC” aplikazioan 400.000 kargatzeak gainditu dira. 2017.
urtean, 171.442 kargatze egin ziren, eta ekainean 23.799. Hasieratik, guztira, 108.230 alta erregistratu dira aplikazioan. Gaur egun, 1.650.000 Barik txartel baino gehiago daude aktibatuta.

Bizkaiko Garraio Publikoaren Bulegoen Sarea handitu egingo da Gernikako bulego berriarekin. Hain zuzen ere, Bizkaiko udalerrian Euskotrenek duen geltokian ireki ditu ateak. Eusko Jaurlaritzako Garraio zuzendaria den Janire Bijueskak eta Bizkaiko Garraio Partzuergoko (BGP) kudeatzaile nagusia den Gorka Ugaldek Euskotreneko zuzendari nagusia den Imanol Lezarekin batera aurkeztu dituzte Gernikako Euskotrenen geltokiko (Geltokia plaza, z/g, behea) bulego berri horren bitartez herritarrei emango dizkiegun zerbitzuak.

Gernikako bulegoak bat egin du BGPk bultzatu duen Garraio Publikoko Bulegoen sarearekin. Bertan, Barik txartelarekin eta Euskotrenen zerbitzuko kudeaketekin zerikusia duten alderdiak izapidetu ahal izango dira Duela urtebete inguru ireki zen Durangoko bulegoarekin batera, Busturialdeko eta Durangaldeko eskualdeetara hurbilduko da zerbitzua.

Harrera emateko ordutegia 08:00etan hasi eta 20:00etan amaituko da, lanegun diren astelehenetatik ostiraletara, udan eta jaiegunen arteko zubietan izan ezik. Udan ordutegi berezia egongo da uztailean eta abuztuan, bai eta jaiegunen arteko zubietan ere: 08:00etatik 15:00etara, lanegun diren astelehenetatik ostiraletara.

Ekainaren 29an, Atxuriko geltokian dagoen bezeroei arreta emateko Euskotrenen garraio publikoko bulegoa itxiko da, eta uztailaren 5ean bulego berri bat irekiko da Gernikan, Euskotrenen geltokian.
Hauxe da Gernikako bulego berriaren helbidea: Geltoki plaza, z/g, behea. Eta hauxe izango da ordutegia:
Astelehenetik ostiralera (lanegunak): 08:00etatik 20:00etara.
Uztailean eta abuztuan, astelehenetik ostiralera (lanegunak): 08:00etatik 15:00etara.

Bizkaiko Garraio Partzuergoak (BGP) Bilboko I. Argazki-maratoi Solidarioaren sariak banatu ditu gaur goizean, eta hauexek izan dira irabazleak: Karen Amaia Bilbao, Garraio publikoa kategorian eta “Circula en verde” izeneko argazkiarekin; Iratxe Azkona, Bizitzeko hiria kategorian eta “Bilbo eta bilbotarrak” lanarekin; eta Carlos Romero, Bilbo, naturala betiko kategorian eta “Junto a la Ría” lanarekin. Gorka Ugalde BGPko zuzendari nagusiak banatu ditu sariak San Mameseko geltokian dagoen BGPren bulegoan, eta lehiaketan parte hartu duten guztiei eskerrak eman dizkie. Guztira, 234 argazki jaso dira.

Maiatzaren 28tik ekainaren 1era bitartean, BEC-en izango den Makina Erremintaren Nazioarteko Bienala dela eta, ezin izango da BEC-en aparkalekua erabili. Barkamenak eskatzen dizkizuegu eragozpenengatik.

Azken urteotan, Bizkaiko Garraio Partzuergoak, Metro Bilbaorekin batera, linean jarritako sistemetan zenbait jarduera egin ditu Bilbo Metropoliko Trenbidearen energia-kontsumo orokorra murrizteko asmoz.

Geltokietako kontsumoa aztertzeko egindako lanen artean, geltokietako sistema bakoitzaren banakako kontsumoa aztertzeko egin zena nabarmen dezakegu. Txostena 2016ko otsailean egin zen, eta ondoriozta zitekeen, oso argi gainera, geltoki batean gehien kontsumitzen duen sistema eskailera mekanikoena dela, lurperatutako geltokien kontsumo osoaren % 50 baino zertxobait gehiago kontsumitzen baitu.

Lurperatutako geltokietako eskaileren mantentze-lanak egiten dituen enpresari 2016. urtean eskatu zitzaion eskailera mekanikoetako kontsumoa aurrezteko neurriak proposa zitzan. Arduratzen den enpresak, ThyssenKrupp Elevadores delakoak, EEC izeneko sistemaren prototipo bat instalatu zuen Indautxuko geltokiko bi eskaileratan, teknikoki zein ekonomikoki bideragarria zen ikusteko eta zenbat energia aurrezten zuen ikusteko.

Honako hau egin zen: igotzeko eskailera bateko (2 motor) eta jaisteko eskailera bateko (2 motor) motorretan bi ekonomizagailu instalatu eta jarri aurretik zein ondoren eskailerek kontsumitzen zutena eta zituzten joerak neurtu ziren .

Proba pilotuaren emaitzen arabera, EEC ekipamenduek eskailera bakoitzean energia-kontsumoaren % 60 aurrez dezakete, eta, hortaz, kostu osoaren inbertsioa urtebete baino gutxiagoko epean itzuliko litzateke. Hau da, inbertsioaren bideragarritasun teknikoa eta ekonomikoa egiaztatu da.

Prototipoa baliozkotzat jo eta gero, 2016. urtearen amaieran, Bilbo Metropoliko Trenbideko eskailera mekanikoen lehenengo multzorako ekonomizagailuak hornitzeko eta instalatzeko lehenengo lehiaketa kaleratu zuen BGPk. ThyssenKrupp Elevadores enpresak 2017. urtean ondo bete du lehiaketan zehaztutakoa.

Hornitzearen kostua 165.041,14 euro da, BEZ barne, eta gauzatzeko epea 6 hilabete. Energia, Turismo eta Agenda Digitaleko Ministerioari atxikitako Energia Dibertsifikatu eta Aurrezteko Institutuak eman du proiektua finantzatzeko laguntza, trenbide-sektorearen eraginkortasun energetikoko jarduketetarako laguntzen programaren barruan. Proiektua, halaber, Hazkunde Iraunkorrerako Programa Operatiboa 2014-2020ren barruan dago, Eskualde Garapenerako Europako Funtsak finantzatzen duena.

Bizkaiko Garraio Partzuergoak (BGP) Ukrainiako ordezkaritza bati harrera egin dio gaur goizean; bisita ofizial bat egiten ari dira Bizkaiko garraio publikoa hurbiletik ezagutzeko. BGPko zuzendari nagusia den Gorka Ugalde izan da anfitrioia ukrainarren bisitan, eta Lviv-eko udal-arduradunek interes handia erakutsi dute Barik sistema Bizkaiko garraio publikoko inguru eta esparru guztietan sortzeko, ezartzeko eta kudeatzeko esperientziari dagokionez, bai eta lurraldeko mugikortasun iraunkorrean duen eraginari dagokionez ere.

Bizkaiko Garraio Partzuergoaren (BGP) “Barik NFC” aplikazioaren bidez 275.000 kargatze baino gehiago egin dira, 645 bat egunean batez beste. 131.134 erabiltzailek doako “app” hori dagoeneko eskuratu dute, Android sistema eragilea duten sakelako telefono batetik Barik txartela kargatzeko aukera ematen duena.

2016ko martxoaren 1az geroztik, posible da Barik txartela sakelako telefono adimendun batetik kargatzea. Bizkaiko Garraio Partzuergoak (BGP) Google PlayStore-n aktibatu zuen “app” hori. Hari esker, denbora laburrean txartela kargatzeko milaka puntu berri erantsi ahal izan dira, eta Bizkaian banatutako 800 fisikoei gehitu zaizkie (tabako dendak, kioskoak, kutxazainak, geltokiak...). Aplikazio berriari esker, erabiltzaileak edozein Barik kargatu ahal izango du, nahi beste aldiz, edozein tokitatik eta eguneko edozein ordutan. Horrez gain, geratzen den saldoari, azken mugimenduei eta beste gauza askori buruzko informazioa lortu ahal izango du.

Patente eta Marken Espainiako Bulegoak Patente titulua eman zion 2017. urtean Bizkaiko Garraio Partzuergoari (BGP), sistema orokorraren segurtasuna gordez Barik txartela telefono mugikorraren bidez kargatzeko prozedura aitzindariagatik. Bi urte iraun duen prozesu metodiko baten ostean, azkenean, estatu eremuan hogei urteko iraupena duen patentea lortu du. Erdietsitako arrakasta horri esker egiaztatu da Bizkaiko Garraio Partzuergoa I+G+b eremuan aitzindaria, berritzailea eta abangoardista dela; hori guztia, garraio publikoaren bidez Bizkaia gero eta hobeto lotu eta kohesionatzeko helburuarekin.

Txartelen sistemen eremuan izaten diren azken aurrerapen teknologikoak, pixkanaka, Bizkaian ezarri nahi ditu BGPk; hain zuzen, proiektua BGPren politika horren barruan sartzen da. Lortutako datuei erreparatuz gero, arrakasta handia izan duela esan daiteke; izan ere, hasierako itxaropenak gainditu egin dira. Aplikazioa abian jarri aurretik, Barik txartelaren ohiko puntuetan kargatu ahal zitekeen txartela (Metro Bilbao, Euskotren, Euskotran, Renfe –FEVE barne-, Larreinetako funikularra, Artxandako funikularra, Bilbobus eta Bizkaibuseko kabinak, tabako dendak, kioskoak, merkataritza lokalak eta BBK-ko kutxazainak); eta abendutik aurrera webgunean bertan (ctb.eus) ere egin daiteke. Gaur egun, 1,6 milioi Barik txartel inguru daude.

Bizkaiko Garraio Partzuergoak aurten ere Umeen Gabonetako Parkean parte hartuko du Metro Bilbaorekin lankidetzan. Bertan, stand bat jarriko du haurrek eta gazteek ondo pasa dezaten. Gainera, garraio publikoa zein Barik txartela erabiltzea sustatuko dute. Hiru espazio bereiziko dira, eta adin ezberdinekoei zuzendutako eskaintzak egongo dira: bost tren-, funikular-, autobus- eta metro-geltoki dituen ginkana bat; margotzeko eremu bat; eta 0 urtetik gorakoentzako ludoteka bat.

Bizkaiko Garraio Partzuergoaren (BGP) Kontseilu Nagusia eguerdian bildu da Bilboko egoitzan, eta 26 milioi euroko inbertsioak onetsi ditu, dagoeneko abian diren jarduketa eta azpiegitura estrategikoak 2018. urtean ere garatzen jarraitzea ahalbidetuko dutenak.

BGPk honako jarduketa hauek garatzen jarraituko du: Urbinagako aldageltokiak Metro Bilbaoren eta Adifen puntu horretako ustiapenen artean; Urdulizko trenbide-pasagunea eta geltokia lurperatzean sortutako azken jarduketak, udalerriko herritarrei amaitutako inguruaz gozatzeko aukera emango dietenak; trenbideak berritzea erabiltzaileei erosotasun eta segurtasun handiagoa emateko; material mugikorrean hobekuntzak egitea, erabiltzaileekin daukan hobetzeko konpromisoari jarraikiz; Arizko Aginte Postu Erredundantea garatzea, zerbitzuak segurtasun eta fidagarritasun handiagoa izan dezan; energia-eraginkortasunerako hobekuntzak egitea (eskailera mekanikoak, ateak...); eta erabiltzaileei arreta eta informazio hobea emateko beste jarduketa batzuk.

Era berean, azpimarratzekoak dira Barik txartelaren inplementaziorako inbertsioak, esaterako: elkarreragintasunean eta sistemaren segurtasunean egindako aurrerapenak, baita garraio-modu desberdinetan erabiltzeko titulu propioetatik eratorritako garapenak ere.

Bizkaiko Garraio Partzuergoak (BGP) Getxoko Gobelako metro-geltokiko estalkia aldatzeko obrak hasiko ditu azaroaren 13an, astelehena. Lanak egiteko 6 asteko epea aurreikusi da eta 60.000 euroko aurrekontua. Hain zuzen ere, erabiltzaileak babesteko markesina dute xede.

Markesinak altzairuzko egitura nagusi bat dauka, eta bertatik hormigoizko plaka batzuk eskegiko dira. Berritzea erabaki da eguraldi txarraren ondorioz egoera txarrean dagoelako. Hori horrela, erdialdeko erreten bat egitea pentsatu da, euriaren ura ondo hustu dadin.

Lehenengo astean, azaroaren 13tik 18ra (06:00), geltokia itxi beharko da obrengatik, nahiz eta lanak gauez egingo diren. Aipatutako egunetan ezin izango da Negubide etorbidean aparkatu, ezta bertara sartu ere 23:00etatik 06:00etara.

Gogoan izan, geltokia itxita egon arren, trenak ohi bezala ibiliko direla. Gobelako geltokiko erabiltzaileek Areeta edo Neguriko geltokiak erabili beharko dituzte bost egun horietan.

Bizkaiko Garraio Partzuergoaren (BGP) Kontseilu Nagusia eguerdian bildu da Bilboko bulegoan eta Metro Bilbaon 8 milioi euro baino gehiagoko inbertsio batzuk adjudikatzea erabaki du. Garrantzitsuenen artean azpimarratzekoak dira: Aginte Postu Zentralizaturako Aginte Postu Erredundantearen hornidura, 2.400.000 euroko zenbatekoagatik eta 24 hilabeteko egikaritze-epearekin; Ibarbengoa-Larrabasterra tartean trenbidea berritzea, 1.818.000 euroko zenbatekoagatik (16 hilabete); lehenengo tren aleen bidaiarientzako ateak egokitzea (500. seriea), 1.245.000 euroko zenbatekoagatik (48 hilabete); katenaria mantentzeko dresina bat hornitzea, 1.200.000 euroko zenbatekoagatik (12 hilabete); tren-gurpilak eta material osagarria profilatzeko tornu berri bat hornitzea, 1.036.000 euroko zenbatekoagatik (12 hilabete), eta Lutxanako azpiestazioaren estalkia ordezkatzea, 332.000 euroko zenbatekoagatik (4 hilabete).

Bestalde, Bizkaiko Garraio Partzuergoak Barik txartela saltzeko, biltzeko, laguntzarekin kargatzeko, biltegiratzeko eta banatzeko kanpo-komertzializazio sare bat ezartzeko eta ustiatzeko zerbitzua kontratatzeko espedientea onetsi du. Hau da, tabako-dendetan, kioskoetan, tokiko saltokietan eta abarretan egin ahal izatea; izan ere, hiriguneetatik kanpoko lekuetan eta landa-eremuetan 2016. urteko kargatzeen zenbatekoa 20 milioi eurotik gorakoa izan zen.

Azkenean, Bizkaiko Garraio Partzuergoak onetsi du Kantabriako Centro Tecnológico en Logística Integral fundazioarekin zuen lankidetza-hitzarmena luzatzea, Kantabriako Gobernuaren mende dagoen entitateak hala eskatu eta gero. Hitzarmenaren xedea da Kantabriako garraio publikoan kontakturik gabeko txartela ezartzen laguntzea eta partzuergoaren esperientziaren berri ematea. Hitzarmen horren bitartez, BGP lankidetzan arituko da Bizkaiko ereduaren antzeko beste bat ezartzeko hainbat alderdiri dagokionez: eskema, ezaugarriak, garapena, teknologia, zehaztapenak...

Bizkaiko garraio publikoko 11 BAB (bezeroentzako argibide bulegoak) jarriko dira martxan azaroaren 7an, Bizkaiko erakunde nagusien eta garraio publikoko operadoreen arteko akordioari esker, eraginpeko erakunde guztietako ordezkariek gaur goizean bertan emandako prentsaurrekoan iragarri dutenez.

Horren ondorioz, orain arte operadore bakar gisa garraio modu bakarreko gorabeherei, kudeaketei eta abarri erantzuna eman izan dieten bulegoek zerbitzu osoa emango dute aipaturiko egunetik hasita, Bizkaiko garraio publikoko sistemarekin loturiko edozein arlotan arreta eskainita. Operadoreek gaur dituzten gainerako informazio-guneek orain arte moduan jarraituko dute lanean.

Agerraldian, honako hauek hartu dute parte: Eusko Jaurlaritzatik, Azpiegitura eta Garraioetako Antonio Aiz sailburuordeak; Bizkaiko Foru Aldunditik, Bizkaiko Garraioa, Mugikortasuna eta Lurraldearen Kohesioa Sustatzeko Saileko foru diputatuak; Bilboko Udaletik, Mugikortasun eta Iraunkortasuneko Alfonso Gil zinegotziak; Estatuko Administraziotik, Renfek EAEn duen Julián Padierna gerenteak eta Bizkaiko Garraio Partzuergotik, Manuel Tejada zuzendari gerenteak.

BAB berriek Barik transakzio guztiak egiteko ahalmena izango dute, Barik txartel pertsonalizatuak ematea barne. Sisteman atxikiriko operadore guztiei buruzko informazio orokorra eskainiko dute: ordutegiak, lineak, tarteak, tarifak, ibilbideak, etab., eta operadore guztien kexei eta erreklamazioei emango diete erantzuna. Horretarako, erreklamazio-orriaren eredu bera izango dute.

Horiek funtzio guztiak ez dira egiten gaur egun erabiltzailearen arretarako ezein kabinatan edo bulegotan. Izan ere, operadore bakoitzak bere zerbitzuari buruzko informazioa eskaintzen du edo bere tituluak kudeatzen ditu.

Hemendik aurrera, gertatzen diren gorabehera edo kudeaketa guztiei emango die erantzuna BAB kudeatzen duen operadoreak, bere garraio moduarekin zerikusia izan zein ez. Egoerarik gehienetan, berak emango du erantzuna, eta hori egiterik ez badu, Bizkaiko Garraio Partzuergoari (BGP) emango dio, ebazpena eman dezan edo entitate eskudunari helaraz diezaion. Horri esker, beharrezkoak ez diren bidaiak, izapideak edo eragozpenak saihestuko dira. Hala, herritarrek Bizkaiko garraio publikoari buruz duten irudipen bateratua handitu nahi da, egin beharreko kudeaketak edo argibideak biltzeko “gune” bakarra emanez.

Metro Bilbaok Errumaniako ordezkaritza baten bisita ofiziala hartu zuen atzo, Bizkaiko garraio publikoa hurbiletik ezagutzeko xedez etorritakoa. Metro Bilbaoko zuzendari nagusia, Eneko Arruebarrena, eta Bizkaiko Garraio Partzuergoko (BGP) zuzendari nagusia, Manu Tejada, anfitrioi gisa aritu dira Errumaniatik jasotako bisitarekin. Honako hauek izan dira Errumaniako ordezkaritza osatu dutenak: lehendakaria eta lehendakariordea, Iustin Cionca eta Silviu Huduzeu hurrenez hurren, Hunedoarako alkatea, Mircea Flaviu, eta Timisko alkatea, Calin Ionel.

Bizkaiko Garraio Partzuergoak (BGP) harrera egin zion atzo arratsaldean Kolonbiako ordezkaritza ofizial bati, Bizkaiko garraio publikoa hurbiletik ezagutzeko etorri zena. Manizales, Montería, Cali eta Pasto udalerrietako alkatetzen plangintzako idazkariek Euskadi bisitatu dute aste honetan. Mugikortasun iraunkorra eta garraioaren garapen ordenatua barne hartzen dituen euskal esperientziarekiko interesa agertu dute, baita metro eta trenaren aurrekariekiko ere, beren garapena eta finantzaketari dagokienez.

Patente eta Marken Espainiako Bulegoak Patente titulua eman dio Bizkaiko Garraio Partzuergoari (BGP), sistema orokorraren segurtasuna gordez Barik txartela telefono mugikorraren bidez kargatzeko prozedura aitzindariagatik. Bi urte iraun duen prozesu metodiko baten ostean, azkenean, estatu eremuan hogei urteko iraupena duen patentea lortu du. Erdietsitako arrakasta horri esker egiaztatu da Bizkaiko Garraio Partzuergoa I+G+b eremuan aitzindaria, berritzailea eta abangoardista dela; hori guztia, garraio publikoaren bidez Bizkaia gero eta hobeto lotu eta kohesionatzeko helburuarekin.

Patente eta Marken Espainiako Bulegoak aitortu du telefono mugikorraren bidez Barik txartela kargatzeko prozedura erabateko asmakuntza bat dela babesari dagokionez. Hain zuzen ere, horregatik eman diote patentea. Patente bat lortu ahal izateko hainbat baldintza bete behar dira, besteak beste berria izatea eta berrikuntza hori industrian aplikatu ahal izatea. Duela bi urte hasi zen patentea eskatzeko prozesua, banku-erakundeek edo erakunde-pribatuek aurrea hartu eta etekinak atera ez zitzaten helburuarekin. Patentea lortzeko prozesu zorrotz bat gainditu behar da, non berritasuna aztertzen den. Horrez gain, mundu osoan miaketa bat egiten da, asmakizuna patentatu daitekeen edo ez zehazteko.

Bizkaiko Garraio Partzuergoaren (BGP) “Barik NFC” aplikazioaren bidez 200.500 karga baino gehiago egin dira dagoeneko. Doako “app” honek 67.498 erabiltzaile ditu guztira eta Android sistema-eragiledun mugikorren bidez Barik txartelak kargatzeko balio du. Egunean batez beste egiten den karga kopurua gero eta handiagoa da: hasi zenetik 352; 2017an 427, eta aurtengo irailean 537.

2016ko martxoaren 1az geroztik, posible da Barik txartela sakelako telefono adimendun batetik kargatzea. Bizkaiko Garraio Partzuergoak (BGP) Google PlayStore-n aktibatu zuen “app” hori. Hari esker, denbora laburrean txartela kargatzeko milaka puntu berri erantsi ahal izan dira, eta Bizkaian banatutako 800 fisikoei gehitu zaizkie (tabako dendak, kioskoak, kutxazainak, geltokiak...). Aplikazio berriari esker, erabiltzaileak edozein Barik kargatu ahal izango du, nahi beste aldiz, edozein tokitatik eta eguneko edozein ordutan. Horrez gain, geratzen den saldoari, azken mugimenduei eta beste gauza askori buruzko informazioa lortu ahal izango du.

Txartelen sistemen eremuan izaten diren azken aurrerapen teknologikoak, pixkanaka, Bizkaian ezarri nahi ditu BGPk; hain zuzen, proiektua BGPren politika horren barruan sartzen da. Lortutako datuei erreparatuz gero, arrakasta handia izan duela esan daiteke; izan ere, hasierako itxaropenak gainditu egin dira. Aplikazioa abian jarri aurretik, Barik txartelaren ohiko puntuetan kargatu ahal zitekeen txartela (Metro Bilbao, Euskotren, Euskotran, Renfe –FEVE barne-, Larreinetako funikularra, Artxandako funikularra, Bilbobus eta Bizkaibuseko kabinak, tabako dendak, kioskoak, merkataritza lokalak eta BBK-ko kutxazainak); eta 2015eko abenduaz geroztik webgunean bertan (ctb.eus) ere egin daiteke. Gaur egun, 1.543.000 milioi Barik txartel daude.

Basauriko Arizen dauden bagoi-tokietako instalazioetan egongo da Metro Bilbaoren Aginte Toki Osagarria, eta lurrazpikoaren sistema guztien kontrola bere gain hartuko du gertakari larriren batek Aginte Toki Nagusia (Nafarroa kaleko 2an dagoena) erabiltezin uzten duenean.

Dagoeneko burutzen ari dira egokitzapen-ekintzak metroren katigamenduetan; horretarako 400.000 euroko inbertsio osagarria egin da, Aginte Toki Osagarri berriaren sorrera aurreikusita.

Egungo Aginte Toki Nagusiak, era berean, trafiko-kudeaketari dagozkion funtzionaltasun berri eta osagarriak izango ditu, barne-eragiketak hobetzea ahalbidetze aldera.

Bizkaiko Garraio Partzuergoaren (BGP) Kontseilu Nagusia gaur eguerdian bildu da Bilbon duen egoitzan, eta onetsi du guztira 4.115.756 euro baliatzea Metro Bilbaoko erabiltzaileen segurtasuna, fidagarritasuna eta egonkortasuna hobetzeko zenbait obra eta jarduketa burutze aldera. Zehazki, 2.194.794 euro inbertituko dira 1. lineako Ibarbengoa eta Larrabasterra geltokien arteko tartearen trenbide-plataforma berritzeko; 1.149.500 euro Sopelako kotxe-tokietako instalazioen unitateetako gurpilen profila zuzendu eta optimizatuko dituen tornu berria erosteko; 428.642 euro Etxebarriko bretelle delakoa berritzeko, 1. lineak eta 2. lineak partekatzen duten tartean noranzkoa aldatzea ahalbidetzen duena; eta 342.820 euro Lutxana azpiestazioko estalkia aldatzeko, hondaturik baitago.

Bestalde, Bizkaiko Garraio Partzuergoaren Kontseilu Nagusiak onetsi egin du soberakinaren kontura egindako aurreko ekitaldiko bi maileguren aurretiazko amortizazioa gauzatzea, 7.857.142 eurotan eta 2.357.142 eurotan. BGPren asmo nagusietako bat ahalik gehien amortizatzea da, eta bi mailegu horiek zigorrik gabe aurretiaz ezezta daitezkeen artean interes-tasarik altuena dute. Deuseztatze horri esker, hobetu egingo da batez besteko zorraren kostua, baita dagozkien interesak ez ordaintzetik sortutako aurrezkiena ere. Bi maileguak 2012. urtean egin ziren.

Azkenik, BGPko Kontseilu Nagusiak bi lankidetza-hitzarmen desberdin onetsi ditu. Lehenengoa Bilbao Bizkaia Ur Partzuergoaren, Urdulizko Udalaren eta Bizkaiko Garraio Partzuergoaren arteko lankidetzaren emaitza da. Horren helburua ur-saneamendu eta -hornidura sarea hobetzea da, udalerria zeharkatzen duen metroaren zatia lurperatzeko obren ostean. BGPri dagokion finantzaketa 579.211 eurokoa da, eta jarduketaren guztizko zenbatekoa 1.544.564 eurokoa da.

Onetsitako bigarren lankidetza-hitzarmena BBC txartel turistikoa Bilbao Bizkaia Card txartelean ezartzeari buruzkoa da, txartel hori atxikitako garraiobideetan erabiltzeko eta adierazitako txartel turistikoa Bizkaibusen lineetan erabil dadin; hori guztia Bizkaiko Foru Aldundiarekin elkarlanean. Era berean, BGPren eta Bilbao Ekintza erakunde publikoaren arteko harremanak arautzen dituen kontratua ezarriko da, BBC txartelari eta horren baitan dagoen BBC txartel turistikoari buruzkoa.

Artxandako Funikularrak bigarren urtez jarraian lortu du TripAdvisor Bikaintasun Ziurtagiria. Ziurtagiria ematen den zazpigarren edizioa dugu aurtengoa, eta TripAdvisor webguneko erabiltzaileen aldeko iritziak oinarri hartuta banatu da.

Webgunea erreferentzia da nazioartean, eta bidaiari zein turistei dago zuzenduta. 150 milioi iruzkin baino gehiago jasotzen ditu, bai eta mundu osoko beste lau milioi entitateren balorazioak ere. Artxandako Funikularrak berriz ere lortu du Bikaintasun Ziurtagiria, eta argitalpen horietan oinarritzen da, hain zuzen ere. Webgunean aldizka erabiltzaileen iritzi onak jasotzen dituzten lekuak eta establezimenduak aintzatesten dira.

Artxandako Funikularrak Castaños eta Artxanda auzoak lotzen ditu hiru minutuko tarte laburrean eta hamabost minutuko maiztasunarekin. Udako hilabeteetan, hau da, ekainean, uztailean, abuztuan eta irailean, hauxe da funikularraren ordutegia: astelehenetik ostegunera 07:15etik 22:00etara; ostiraletan, larunbatetan eta jaiegunen bezperatan, 07:15etik 23:00etara; eta igandeetan eta jaiegunetan 08:15etik 22:00etara.