Bizkaiko Garraio Partzuergoak Goyo Sarasola (Santurtzi, 1975) izendatu du gaur erakundearen zuzendari kudeatzaile berri, Roberto Muñozek kargua arrazoi pertsonalengatik uztea erabaki ondoren. EHUko industria-ingeniaria, garraio publikoaren eta trenbide-sektorearen arloan 20 urte baino gehiagoko esperientzia duela heldu da Sarasola Partzuergoaren gerentziara eta Muñozen lekukoa hartu du. Bizkaiko garraio publikorako proiektu estrategikoen bultzadak markatutako etapa baten ondoren utzi du kargua Muñozek.

Muñozen agintaldian, Bizkaiko Garraio Partzuergoak aurrera egin du Barik sistemaren digitalizazioan, Barik Mobile sistema hedatuz, eta funtsezko jarduerak bultzatu ditu Metro Bilbao modernizatzeko, hala nola unitateak, seinaleztatzea eta aginte-postu zentralizatua berritzeko proiektuaren koordinazioa. Hala, Bizkaiko Garraio Partzuergoaren buru legez jardun duen etapa amaitu du Muñozek, etapa bat Bizkaiko garraio publikoaren sistemaren eraginkortasuna, irisgarritasuna eta modernizazioa indartzera bideratua.

Testuinguru horretan, neurri handi batean, Euskadiko trenbide-erakunde nagusietan ibilbide luzea eginda hartu du Sarasolak bere gain Bizkaiko Garraio Partzuergoaren gerentzia. Horri esker, erabat ezagutu ditu trenbide-azpiegituren plangintza, eraikuntza, mantentzea eta ustiapena, bai eta Bizkaiko eta EAE osoko mugikortasuna eta metropoli-garraioa ere. Gaur arte, Metro Bilbaoko Operazioen zuzendaria izan da, eta urtean 100 milioi bidaiari baino gehiago mugitzen dituen sare baten operazio integrala zuzendu du erakunde horretan. Erantzukizun postu horretatik, hainbat proiektu gidatu ditu: zerbitzu-eskaintzaren plangintza, aginte-postuaren kudeaketa, giza baliabideen eta baliabide operatiboen koordinazioa eta trenbide-ustiapenaren modernizazio-estrategia.

Sarasolaren profilak Bizkaiko eta Euskadiko garraio publikoaren ikuspegi zabala eskaintzen du, bai ikuspuntu operatibotik, bai plangintza, koordinazio instituzional eta kudeaketa teknikotik. Metro Bilbaon jardun baino lehen, Euskal Trenbide Sareko operazioen zuzendaria izan zen, eta Euskal Trenbide Sareak (ETS) kudeatutako sarearen trenbide-ustiapenaren zuzendaritza eta trenbide-sistemen, geltokien, trafikoaren eta mantentze-lanen ikuskapena izan zituen bere ardurapean.

Gainera, Sarasolak zuzenean ezagutzen du Bizkaiko Garraio Partzuergoaren funtzionamendua, 2020an partzuergoko gobernu-organoetako kide izan baitzen, Eusko Jaurlaritzaren ordezkari gisa. Esperientzia horri esker, garraio publikoaren plangintzari, erakundeen koordinazioari eta finantzaketari lotutako espazioetan parte hartu ahal izan zuen. Sarasolaren izendapenarekin, Bizkaiko Garraio Partzuergoak jarraipena ematen dio kudeaketa profesionalizatuari, eta indartu egiten du Bizkaiko garraio publikoaren sistema hobetzen, integratzen eta modernizatzen jarraitzeko duen gaitasun teknikoa.

Bizkaiko Garraio Partzuergoak (BGP) gaur aktibatuko du Barik Mobile aplikazioa iOS sistema eragilea duten iPhone telefonoetarako eta, horrela, beste urrats bat emango du Barik sistemaren digitalizazioan. Aplikazioa 2025eko martxotik dago erabilgarri Android gailuetarako, eta, orain, iOSen erabiltzaileek ere garraio publikoan bidaiatu ahal izango dute telefono mugikorrean Barik txartel digital batekin, txartel fisikoa eraman beharrik gabe. Orain gertatzen ari den aurrerapena ez da Barik Mobile abiaraztea, baizik eta zerbitzua iPhonera zabaltzea eta aplikazio bateratu bat martxan jartzea. Aplikazioak soluzio bakarrean integratzen ditu mugikorreko txartel birtualarekin bidaiatzeko aukera eta Barik txartel fisikoak kontsultatzeko eta kargatzeko ohiko funtzionalitateak. Bertsio integral berri hau iPhonerako argitaratuko da hasieran, eta datozen asteetan egongo da eskuragarri Androiderako. Ordura arte, Androiden erabiltzaileek normaltasunez erabiltzen jarraitu ahal izango dute egungo Barik NFC eta Barik Mobile aplikazioak, eta tresna independente gisa funtzionatzen jarraituko dute aldi baterako epe horretan.

Barik Mobilek, beraz, tresna bakarrean integratuko ditu mugikorrarekin bidaiatzeko eta Barik txartelari lotutako eragiketa nagusiak egiteko aukera: saldoa kontsultatu, azken mugimenduak bistaratu, kargatzeko egiaztagiriak eskuratu, txanpon- eta aldi baterako tituluak kargatu, aldi baterako tituluen eremuak handitu eta Barik sistemari buruzko informazioa kontsultatu. Aplikazioak, gainera, hainbat baliabide ere baditu, hala nola MovEuskadi bidaien planifikatzailea eta Bizkaiko garraioaren mapa.

Barik Mobile iPhonera hedatuta, BGPk sistema erosoago, irisgarriago eta integratuago baterantz egiten du aurrera, eta helburua da garraio publikoaren eguneroko erabilera erraztea, erabiltzaileen izapideak sinplifikatzea eta sistemaren kudeaketa modernizatzen jarraitzea, ikuspegi eraginkorrago, digitalago eta herritarren benetako beharretara bideratuago.

Nola funtzionatzen du?

Barik Mobile identifikatutako erabiltzaile bati lotutako txartel pertsonalizatu baten bidez funtzionatzen du. Dagoeneko Barik txartel pertsonalizatua duten pertsonek zuzenean birtualizatu ahal izango dute aplikaziotik. Era berean, txartel pertsonalizaturik ez dutenek Barik Mobile pertsonalizatua sortu ahal izango dute aplikazioaren beraren bidez. Aldiz, Barik txartel anonimoak ezin dira birtualizatu. Txartel anonimo baten erabiltzaileek Barik Mobile erabili nahi badute, aurrez Barik sisteman erregistratuta egon beharko dute. Oraindik erregistratuta ez badaude, alta-prozesua Bezeroarentzako Arreta Bulego batean egin ahal izango dute. Behin erregistratuta, beren Barik Mobile pertsonalizatua zuzenean sortu ahal izango dute aplikaziotik.

Txartel pertsonalizatua digitalizatzea borondatezkoa izango da: txartel fisikoa erabiltzen jarraitu nahi duenak hala egin ahal izango du, baina Barik Mobile aktibatzen duenak euskarri digitalean erabiliko du txartel pertsonalizatu hori. Txartel pertsonalizatua pertsona erabiltzaile bakar bati eta titulu, saldo edo hobari jakin batzuei lotuta dago. Segurtasunagatik, trazabilitateagatik eta erabilera bikoiztuak prebenitzeko, sistemak euskarri nagusi bakarra izan dezake aktibo txartel pertsonalizatu horrentzat: fisikoa edo digitala. Horrela, txartel bera bi euskarri desberdinetatik balidatzea saihesten da, eta titulu pertsonalak eta besterenezinak behar bezala erabiltzen direla bermatzen da. Garraio-txartel pertsonalizatuen digitalizazio-prozesuetan ohikoa den irizpidea da, Madril eta Bartzelona bezalako hirietan erabiltzen diren antzeko sistemekin bat datorrena.

Aplikazioak Barik sistemaren ohiko tituluak kargatzeko aukera emango du, bai monederoak bai aldi baterakoak, Creditrans, Gizatrans, Bidai eta Gazte tituluak barne. Kargak banku-txartelaren bidez, Bizumen bidez eta, iOSen kasuan, Apple Pay bidez ere ordaindu ahal izango dira. Karga Barik Mobile baten gainean egiten denean, automatikoki aktibatuko da. Txartel fisikoen kasuan, berriz, txartela telefono mugikorrera hurbildu beharko da eragiketa osatzeko, karga-makinetara, balioztagailuetara edo garraio-sareko beste ekipamendu batzuetara joan beharrik gabe.

Barik Mobile ezartzeko fase honetan, 15 urtetik beherako pertsonek beren txartel fisikoa erabiltzen jarraitu beharko dute. Gainera, txartel pertsonalizatua denez, Barik Mobile erabilera pertsonal eta besterenezinerako izango da, eta ez du balidazio anizkoitza ezta bi telefono mugikorretan aldi berean erabiltzea ere ahalbidetuko. Aplikazioak gailua aldatzeko aukera emango du, baina zerbitzuaren erabilera egokia bermatzeko kontrol-mekanismoekin.

Barik Mobile Bizkaiko garraio publikoan erabili ahal izango da, gaur egun aurreikusitako salbuespenekin: Renfe, Zubi Esekiko ontzitxoa, Portugaleteko boteak eta Metro Bilbaoren Etxebarriko, Leioako, Ibarbengoako eta BECeko aparkaleku disuasorioak. Horietan, txartel fisikoa erabiltzen jarraitu beharko da dagozkion sistemak egokitu arte.

Bidaiaren balidazioa

Barik Mobile-rekin bidaiatu ahal izateko, aplikazioa Google Play Store-tik edo App Store-tik deskargatu ondoren, erabiltzaileak telefono mugikorra balioztagailura hurbildu beharko du. Androiden, nahikoa izango da gailua desblokeatuta edukitzea, NFCa aktibatuta eta behar bezala konfiguratuta. iPhonen, berriz, aplikazioa ireki eta balidazio-aukera sakatu beharko da mugikorra balioztagailura hurbildu aurretik, nahiz eta erabilera hori errazteko sarbide zuzenak eta widgetak gaitu diren.

Bi sistemetan, telefonoak piztuta eta bateriarekin egon beharko du. Ez da beharrezkoa izango internet-konexiorik balidatzeko, baina bai kargak edo aplikazioaren barruko beste eragiketa batzuk egiteko.

iPhonen kasuan, Barik Mobile iPhone 7 edo goragoko gailuetarako egongo da erabilgarri, iOS 13 edo goragoko bertsioarekin, txartel fisikoak kontsultatzeko eta kargatzeko funtzionalitateetarako. Txartel digitalarekin balidatu eta bidaiatu ahal izateko, berriz, iPhone XS edo goragoko bat eta iOS 17.4 edo goragoko bertsioa beharko dira. Androiden, aplikazioak Android 8 edo goragoko bertsioa duten telefonoetan funtzionatzen du.

Bideoa: https://youtu.be/rLgQE5zMA0M

Bizkaiko Garraio Partzuergoko (BGP) Kontseilu Nagusiak Metro Bilbao berritzeko proiektua koordinatu eta integratzeko laguntza teknikoko zerbitzua kontratatzea onartu du. Laguntza tekniko honek aurreikusitako jarduketa guztien kudeaketa koordinatua ziurtatzea ahalbidetuko du, proiektua osatzen duten elementuen integrazioa eta jarraipena erraztuz. Zehatzago esanda, berrikuntza egituratzen duten hiru lote handiak abian jartzeko euskarria izango da: tren-unitateak ordezkatzea, Komunikazioetan Oinarritutako Trenaren Kontrola deritzon seinaleztapen-sistemara migratzea eta Aginte Mahai Zentralizatua modernizatzea. Horrela konplexutasun handiko proiektu estrategiko baten egikaritze integratua antolatu, koordinatu eta bermatzeko tresna da eta bermatu egiten da garapenak sinkronizatuta eta eraginkortasunez egingo duela aurrera, modernoagoa, eraginkorragoa eta datozen hamarkadetako mugikortasun-erronkei erantzuteko prestatuagoa egongo den etorkizuneko Metro Bilbaoren oinarriak ezarriz.

Bizkaiko Garraio Partzuergoak (BGP) beste aurrerapauso bat eman du garraio publikoaren digitalizazioan; izan ere, Bizkaiko herritarrei zuzendutako parte-hartze izaerako prozesu bat abiatu du, iPhone gailuetan erabiliko den Barik Mobile aplikazioaren etorkizuneko bertsioa hobetzeko. Ekimen horren bidez 500 pertsonako talde bat osatzea da asmoa, aplikazioa probatu dezaten App Store dendan behin betiko kaleratu baino lehen. Horretarako, parte-hartzaileek aplikazioa baldintza errealetan probatu ahal izango dute eta iradokizunak egin, aplikazioa argitara eman baino lehen hobekuntza-puntuak antzemateko. BGPk uste du pixkanakako ezarpen-eredu hori egokiena dela esperientziarik onena bermatzeko.

Barik Mobile aplikazioa BGPk garatu du eta Barik txartela mugikorrean eramateko aukera emango du garraio publikoan zuzeneko baliozkotzeak egiteko, euskarri fisikoaren beharrik izan gabe. 2025eko martxoan, Partzuergoak tresna hori gaitu zuen Android sistema erabiltzen dutenentzako, eta, oraingoan, iOS sistemarako garapenarekin, zabalkundea osatzea du helburu. Era berean, BGP lanean ari da Android bertsioa eguneratzeko, izan ere, aplikazio bakarrean bateratu nahi ditu gaur egun eskuragarri dauden funtzionaltasun guztiak, hartara, sistema integratuagoa, erosoagoa eta irisgarriagoa izan dadin. Ildo horretatik, laster, erabiltzaileek aplikazio bera erabilita kargatu ahalko dituzte tituluak, kontsultatuko dituzte mugimenduak eta kudeatuko dute txartelaren inguruko informazio guztia, iOS zein Android erabilita.

Aplikazioa probatzeko taldean parte hartu nahi dutenek barikctb@cotrabi.eus helbidera mezu bat bidalita eman dezakete izena, tokiak amaitzen diren arte, eta datu-pertsonalak (argazkia barne) eman beharko dituzte Bezeroen Arretarako Bulegoetan. Probak egiteko aldia irekita egongo da harik eta Bizkaiko Garraio Partzuergoak erabakitzen duen arte aplikazioak funtzionamendu-maila egokia lortu duela. Edozein titulu-mota —Creditrans edo Gizatrans diru-tituluak eta aldi baterako Bidai edo Gazte tituluak— dutenek erabili ahalko dute aplikazioa, betiere aurretiaz Barik txartel pertsonalizatua bazuten edo beren datuak BGPren Bezeroen Arretarako Bulegoetan erregistratu badituzte. Betekizun teknikoei dagokienez, aplikazioaren funtzio orokorrak bateragarriak izango dira gutxienez iPhone 7 mugikorra daukaten eta iOS 13 bertsioa darabilten gailuekin; aitzitik, bidaiak baliozkotu ahal izateko, erabiltzaileek iPhone XS bat izan beharko dute gutxienez, iOS 17.4 bertsioarekin edo hori baino berriagoa den bertsioarekin.

Probak egiteko fasea amaitutakoan eta aplikazioa optimizatuta dagoenean, BGPk ofizialki argitaratuko du App Store dendan, eta horren berri emango du behar bezala. Erabiltzaileek erabaki beharko dute euskarri tradizionala edo digitala erabili nahi duten.

Bihar sartuko da indarrean partzuergoko tituluetako tarifen urteko eguneraketa. BGPren kontseiluak otsailaren 5ean onetsi zuen eguneraketa eta batez beste % 3ko igoera izango du. Zehazki, Barik Kide edo Giza txartelekin egindako bidaien balioa 3 zentimo inguru handituko da, eta aldizkako tituluek 10 zentimoko igoera izango dute.

BGPk azpimarratzen du eguneraketa horrek kalitatezko garraio publikoaren sistema eraginkorra eta jasangarria bermatzeko konpromisoari erantzuten diola, aldi berean herritarrentzako prezio irisgarriak mantenduz. Neurri horiekin, Bizkaiak mugikortasun-eredu bidezkoago baten aldeko apustua berresten du, eguneroko joan-etorriak erraztuko dituena eta erabiltzaile guztien bizi-kalitatea hobetzen lagunduko duena.

.

Bizkaiko Garraio Partzuergoak (BGP) gaur egun Bizkaian indarrean dauden garraio publikorako hobari-neurriak 2026ko abenduaren 31ra arte luzatzea erabaki du gaur. Zehazki, hauek dira mantenduko diren neurriak: 14 urtera arteko adingabeentzako doako garraioa, Gazte tituluen tarifan ezarritako % 50eko deskontua eta % 40ko hobaria gainerako bidaia anitzeko titulu eta abonuetan.

Kontseiluan azaldu dutenez, luzapen horren helburua da, batetik, gaur arte onetsitako errege dekretuetan ezarritako garraio publiko kolektiboa babesteko neurriei jarraipena ematea eta, bestetik, Bizkaiko erabiltzaileek 2026an ere tarifa merkeagoak izan ditzaten bermatzea.

Tarifen eguneraketa
Horrez gain, urtero bezala, BGPk partzuergoko tituluen tarifak eguneratzea onetsi du, batez besteko % 3ko igoerarekin. Horiek horrela, Barik edo Gizatrans txartelekin egindako bidaien balioa 3 zentimo inguru handituko da, eta aldizkako tituluek 10 zentimoko igoera izango dute.

BGPk azpimarratzen du eguneraketa horrek kalitatezko garraio publikoaren sistema eraginkorra eta jasangarria bermatzeko konpromisoari erantzuten diola, aldi berean herritarrentzako prezio irisgarriak mantenduz. Neurri horiekin, Bizkaiak mugikortasun-eredu bidezkoago baten aldeko apustua berresten du, eguneroko joan-etorriak erraztuko dituena eta erabiltzaile guztien bizi-kalitatea hobetzen lagunduko duena.

Bizkaiko Garraio Partzuergoak (BGP) amaitu du gaurtik aurrera Bizkaiko hiri barruko eta hiriarteko autobusetan, eta baita Bizkaia Zubian eta Artxandako funikularrean ere, MUGI txartela erabiltzeko aukera ematen duen garapena. Horrela, lurraldeen arteko garraio publikoaren sistemaren elkarreragingarritasuna zabaltzen da eta Bizkaian MUGI txartelaren erabilera bideratzen da.

Garraiobide berri horiek sartzeak Bizkaiko garraio-sistemaren elkarreragingarritasuna burutzea ekarri du, bai eta dauden hiru garraio-txartelak (BAT, BARIK eta MUGI), bana lurralde bakoitzeko, euskal garraio publikoaren sare osoan berdin erabiltzeko aukera ematen duen egokitzapena ere. Proiektua hainbat erakunde eta operadoreren lankidetzari esker gauzatu ahal izan da.
Ildo horretatik, MUGI honako operadore hauetan erabili ahal izango da: Bizkaibus, Bilbobus, Kbus (Barakaldo), Lejoan Busa (Leioa), Galdabusa (Galdakao), Etxebarri Bus, Erandio Busa, Sopelbus (Sopela), Artxandako funikularra eta Bizkaia Zubia. Bizkaia Zubiko ontziskan eta Portugaleteko Boteetan laster aktibatuko da Mugi erabiltzeko aukera. Derrigorrez gogorarazi behar da Metro Bilbaok dagoeneko onartzen duela Mugi txartela, Bizkaiko garraio publikoaren sistemaren barruan erabiltzeko aukerak zabalduz.

Sistemak operadore bakoitzari dagokion Creditrans diru-tarifa aplikatuko du eta barne hartuko du Familia Ugariaren profilen aintzatespena. Gainera, txartelak BARIK txartelaren baliokide gisa funtzionatuko du, erabilera-esperientzia homogeneoa bermatuz.

Operadore guztietan, Bizkaibusen eta Erandio Bus zerbitzuan izan ezik, balidazioa bakarrik egingo da ibilgailura sartzerakoan.

Hedapen hau urrats erabakigarria da Bizkaian eta EAE osoan garraio publikoa erabat integratzeko bidean. Lurralde kohesionatuagoa lortzen laguntzen du, lurraldeen arteko joan-etorriak errazten ditu eta garraio publikoa erabiltzean erabiltzaileen esperientzia hobetzen du.

BGPren 2026rako aurrekontua
BGPren Kontseilu Nagusiak gaur egindako bileran hasieran onartu da Partzuergoaren 2026ko aurrekontu orokorra, 237.530.000 eurokoa dena.

Kontu horietan garraio publikoaren azpiegiturak eta sistemak hobetzeko eta modernizatzeko hainbat inbertsio sartzen dira. Jarduketa garrantzitsuenen artean honako hauek daude: telebista-zirkuitu itxien sistema (TZI) eta bidaiariari informazioa emateko sistema eraberritzea (1,8 milioi), Kabiezesko azpiestazioaren behin betiko eraldaketa (1,4 milioi), Erandio eta Lutxana arteko trenbidea berritzea (milioi 1), baita ATP/ATO seinaleztapen-sistemaren zaharkitzea arintzera bideratutako hainbat esku-hartze ere (9 milioi). Halaber, Urbinagako zubibidearen egitura konpontzea (956.500 euro), Ibarbengoako aparkalekuan planta fotovoltaiko bat jartzea (940.600 euro) eta Urbinagako aldageltokia garatzea (363.000 euro) aurreikusten da.

Era berean, aurrekontuan ekipamendu teknologiko berria sartzea aurreikusten da (hala nola QR eta EMV sistemak, balidagailuak, bizikleten aparkalekuak), erabiltzaileen esperientzia hobetzen jarraitzeko eta garraio-sistemaren digitalizazioan aurrera egiteko asmoz.

.

Bizkaiko Garraio Partzuergoak (BGP) aurtengo bigarren seihilekorako onartutako hobari-neurriak 2026ko otsailaren 20ra arte luzatzea erabaki du gaur. Honako hauek dira:

• 14 urtera bitarteko haurrek doan bidaiatzea
• Gazte tituluen tarifan % 50eko deskontua
• Gainontzeko bidaia ugariko abonu eta txarteletan % 40ko deskontua

Kontseiluan adierazi duten bezala, helburua da zenbait errege-dekretutan hiriko eta hiriarteko lurreko garraio publiko kolektiboaren inguruko neurrientzako aurreikusitako aldiak betetzea BGPk araututako txarteletan.

Hortaz, erabakiak Partzuergoko txarteletan eragina izango du 2026ko urtarrilaren 1a eta 2026ko otsailaren 20a bitarteko aldian, ezarpena urtebetez bete dadin.